Aıman: Men aı saıyn eki kitap oqımyn.
Sholpan: Sol da sóz bop pa? Men aıyna tórteýin bitiremin.
Bul dıalogtan Sholpandy naǵyz prodýktıvti dersiń. Ýaqytyn tıimdi paıdalanyp-aq júr. Aptasyna bir kitapty bitire salý ol úshin túkke turǵysyz. Alaıda, ol effektıvti me?
Aıman bir kitapty eki apta ne odan da uzaq oqyǵanymen, barynsha tyńǵylyqty, muqııat bolýy ábden múmkin. Oqyǵan aqparatyn jazyp alyp, ony ómirde qoldanyp, aınalasyndaǵylarmen bólisetin shyǵar. Muny effektıvtilik deıdi. Dese de, bul mysal Sholpannyń kitapty atústi oqı salatynyn bildirmeıdi. Baıqaǵanymyzdaı, ekeýiniń prodýktıvtiligi de, effektıvtiligi de ár túrli.
Prodýktıvtilik az ýaqytta kóp jumys tyndyrýdan kórinis tabady. Al effektıvtilik árekettiń qanshalyqty sapaly bolǵanyn ańǵartady.
Kóbine jumys berýshiler qyzmetkerden prodýktıvtilikti talap etedi. Qyzmetker tym prodýktıvti bolýy múmkin. Biraq az ýaqytta kóp jumys tyndyramyn dep, kúsh-jigerin kereksiz dúnıege sarp etse she?!
Mysaly, aptasyna 7 sıýjet usynatyn jýrnalıst pen aptasyna 2 sıýjet usynatyn jýrnalıstiń aıyrmashylyǵy bar. Nege? Sebebi biri sanǵa, biri sapaǵa jumys isteıdi. Biraq, nátıje eki túrli.
Tipti bolmasa, birneshe tildi qatar úırenýge bel baılaǵan Dáýlet pen bir tildi jaqsylap úırenýge kúsh salǵan Saýlettiń mysalyn qarastyrýǵa bolady. Sáýlet birneshe tildi qatar úırenbese de, Dáýletke qaraǵanda bir tilde erkin sóılep ketý yqtımaldyǵy joǵary.
Joǵarydaǵy mysaldar qarapaıym ári uǵynyqty boldy dep oılaımyn. Kúnderińiz prodýktıvti, áreketterińiz effektıvti bolsyn!
Nazerke Ásetova
