Mańǵystaý, Qyzylorda oblystarynda ashtan qyrylyp jatqan mal ıelerine ótemaqy tólenbeıdi, dep habarlaıdy “KTK” arnasy.
Tek azyǵyn alyp, qalǵan mal basyn saqtap qalýǵa úkimetten kómek beriledi. Ázirge shyǵynnyń naqty somasy eseptelmegen. Aýyl sharýashylyǵy mınıstrligi jaǵdaıdyń bulaısha ýshyǵyp ketýine taǵy da ákimderdi kinálady.
Bir ǵana Mańǵystaý oblysynda qurǵaqshylyqtyń kesirinen 1300-den astam mal basy aram qatqan. Onyń ishinde 540 bas jylqy, 46 bas iri qara jáne 492 usaq mal.
Aýyl sharýashylyǵy mınıstrligi qalǵan tórt túlikti aman alyp qalýyna Úkimetten 3 mıllıard 500 mıllıon teńge qordan bólýdi surap otyr.
Qazir "Kaspıı" korporaııasynan mal azyǵyn arzandatýǵa 200 mıllıon teńge bólingen. Al maýsymnyń 20-na qaraı Mańǵystaý oblysyna 600 tonnadan astam arpa jetkiziledi. Jalpy 1700 tonnadan astam arpa osy óńirge bólinbek. Al jaǵdaıdyń bulaısha shıelenisýin mınıstrlik jergilikti bıliktegilerdiń shıkiligi dep otyr.
“Negizi jergilikti ákimdik jaǵdaıdyń ýshyǵyp bara jatqany jaıynda aldyn ala habarlaýy kerek edi. Maldyń qyrylyp jatqanyn aýyl sharýashylyǵy mınıstrligi ózi anyqtady. Bul qalyptasqan jaǵdaı kúzde et baǵasynyń qymbattaýyna esh áser etpeıdi. Sebebi qyrylǵan mal basynyń sany óńirdegi jalpy kóleminiń 0,1 paıyzyn ǵana quraıdy. Et qymbattamaıdy degen senimdemiz”, – deıdi QR AShM mal sharýashylyǵy ónimin óndirý jáne qaıta óńdeý departamenti dırektorynyń orynbasary Qaırat Mutaev.
