El Táýelsizdiginiń 30 jyldyǵy aıasynda ótken jeksenbide 150-den asa adam qatysqan velosherý ótti. Qala ákimdigi, deneshynyqtyrý jáne sport bóliminiń qoldaýymen «Velotravel Tekeli» klýby uıymdastyrǵan shara kópshiliktiń kózaıymyna aıyalyp, rýhty aspandatyp, tumsa tabıǵatty Tekelini taǵy bir qyrynan tanytty.
Mádenıet úıiniń alańyna jınalǵan velosherýshiler men tamashalaýǵa kelgen qaýymǵa jyly lebizin bildirip, táýelsizdik tańdarynda qaıta túlegen shaǵyn qalamyzdyń týrıstik áleýetin arttyrý ýaqyt talaby ekenin, el men jer tanýǵa, jas urpaqty patrıotızmge baýlýǵa yqpaly zor osyndaı sharalardyń aýqymyn keńeıtýdiń mańyzdylyǵyn alǵa tartqan qala ákimi Batyr Moldahmetov egemendi elimizdiń eńseli bolýyn tilep, jurtshylyqty salaýatty ómir saltyn ustanýǵa, buqaralyq sportqa bet burýǵa shaqyrdy.
Pandemııanyń saldarynan keıinge shegerilgen bıylǵy velomaýsymnyń ashylýyna oraı uıymdastyrylǵan saltanatty sherýge qatysýshylar kók Týdy jelbiretip, eldik rámizderge qurmet kórsetip, eljandylyqtyń úlgisin tanytty.
Velosherýge Almaty qalasynyń «UniversalBicycleTeam», Taldyqorǵannyń «Velopark.TDK», «Velopark.kz» klýbtary, «Jetisý regbı» áıelder komandasy, A.Kıvılev atyndaǵy velosporttan oblystyq olımpıada izbasarlaryn daıyndaýǵa arnalǵan arnaýly balalar men jasóspirimder sport mektebiniń, Karate shınkıokýshınkaı federaııasynyń Tekeli qalalyq fılıalynyń jasóspirimderi men jattyqty-rýshylary jáne velosportqa beıim qala turǵyndary men qonaqtary qatysty.
Olar aldyn ala belgilengen 8 shaqyrym joldy asqan saltanatpen júrip ótti. Polıııa qyzmetiniń kóligi qaýipsizdikti qamtamasyz etip, jol bastap otyrdy. Dál osy mezette paraplanmen kók júzinde tolqyndana jelbiregen Memlekettik Týymyz jurtshylyqtyń nazaryn aýdaryp, kún shapaǵymen jalqyndanyp, kózge kórinbeıtin, jandy tebirentetin bir sezimdi jamyratyp, júrekterdi birge tolqytty.
«Velotravel Tekeli» klýbynyń jetekshisi ErmekSamıev:
Bizdiń klýbtyń 100-ge tarta múshesi bar. Úlkenimiz 70-ke kelip qalsa, eń kishimiz 8 jasta. Tek Tekeli qalasynyń ǵana emes, Almaty, Astana, Atyraý qalalarynyń áýesqoı velosportshylary klýbymyzdyń qataryna qosylyp, turaqty baılanys jasap turamyz. Jerlesimiz, velosporttan Qazaqstan qurama komandasynyń múshesi, kásibı velosportshy Denıs Sergıenkonyń qasymyzdan tabylyp, shetelderde ótetin dodalarǵa «Velotravel Tekeli» klýbynyń arnaıy kıimin kıip qatysatyny úlken maqtanysh. Jalpy klýbymyz kásibı sporttyemes, týrıstik sport baǵytyn ustanady. Jaqynda bir tobymyz Burhan bulaqqa baryp keldik. Dittegen jerge 10 saǵatta jettik. Shatyr quryp, qonyp, sarqyramanyń, tabıǵattyń sulýlyǵyna tamsanyp, týǵan jerdiń qasıetin sezinip qaıttyq. Aldaǵy ýaqytta Kólsaıǵa, Altynemelge, Sharynǵa, jalpy Almaty oblysyndaǵy tanymal, tarıhı oryndarǵa barýdy josparlap otyrmyz», – dep qos dóńgelekke qyzyq úshin qonbaǵandaryn, salaýatty ómir saltyn qoldaýmen qatar, otandyq týrızmdi ilgeriletýge kóńil bólgenderin ańǵartty.
Velosherýge qatysqan almatylyq, taldyqorǵandyq qonaqtardy sózge tartyp edik, kóbi Tekelige birinshi ret kelgenderin, tabıǵaty, aýasy erekshe unaǵanyn aıtty.
«Týrısterdi tartýǵa baǵyttalǵan osyndaı sharalar jıi ótkizilse, Tekelini tanıtyndardyń, qaıta kelýge asyǵatyndardyń qatary kóp bolady dep oılaımyz»,– deıdi olar.
Shara sońynda velosherýge belsendi qatysqandar, uıymdastyrýǵa qolqabys etkender Alǵyshattarmen marapattaldy, qatysýshylardyń barlyǵyna estelik syılyqtar tabys etildi.
Torǵyn TURLYBAEVA
