Búgin jazýshy, shejireshi, professor Ǵ.Músirepov atyndaǵy ádebı syılyqtyń ıegeri Mombek Ábdiákimulynyń tól týyndysy «Shymkent qalasynyń tarıhy» atty kitabynyń tusaýkeseri ótti. Ál-Farabı atyndaǵy qalalyq ǵylymı-ámbebap kitaphanasynda Táýelsizdiktiń 30 jyldyǵyna oraı uıymdastyrylǵan jıyndy Qazaqstan Respýblıkasynyń Mádenıet qaıratkeri Asqar Álıhan júrgizdi. Basqosýǵa Shymkent qalasy ákiminiń birinshi orynbasary Shyńǵys Muqan, Túrkistan oblystyq ardagerler keńesiniń tóraǵasy J.Máýlenqulov, jazýshy Marhabat Baıǵut jáne t.b. zııaly qaýym ókilderi qatysyp, jaryq kórgen kitap týraly óz oı-pikirlerin bólisti.
Kitap - Elbasy N.Á.Nazarbaevtyń «Bolashaqqa baǵdar: rýhanı jańǵyrý» atty baǵdarlamasy aıasynda, turǵyndarynyń sany mıllıonǵa jetip, respýblıka kóleminde aıryqsha mártebesi bar úshinshi megapolıs atanǵan Shymkent qalasynyń tereń tarıhy jaıly jazylǵan. Sondaı-aq, 2200 jyldyq tarıhy bar qalanyń tyń derekterimen etene tanystyra otyryp, jastardyń otanǵa, tarıhqa, kitapqa degen qyzyǵýshylyǵyn arttyrý maqsatynda jaryq kórdi.
Kitapty tanystyrý barysynda avtor: «Bul jańa týyndyda Shymkenttiń álimsaq zamannan kúni búginge deıingi tarıhyna tutastaı sholý jasala kele ótken ǵasyrlarda shaharda iske asqan barlyq qadaý-qadaý tarıhı oqıǵalar haqynda molynan baıandalǵan. Sonymen qatar, onyń bergi kezeńderdegi ósip-órkendeýi men damý joly týraly tolyq maǵlumattyń kóńili oıaý jastarǵa, ǵalymdarǵa, jalpy oqyrmanǵa bereri mol», — dedi Mombek Ábdiákimuly.
Shymkent qalasy ákimdiginiń baspasóz qyzmeti
