Búgin jetinshi shaqyrylymdaǵy Shymkent qalasy máslıhatynyń kezekti altynshy sessııasy ótti. Sessııanyń kún tártibinde qalanyń 2020 jylǵy bıýdjetiniń atqarylýy týraly, halyqtyń áleýmettik osal toptaryn qoldaý jáne ońaltý sharalary, jolaýshylar kóligi jáne avtomobıl joldary basqarmasynyń, qala turǵyndaryn baspanamen qamtý sharalarynyń esebi tyńdaldy. Atalǵan máselelerdiń bári de turaqty komıssııalarda egjeı-tegjeıli qaralǵan.
Sessııada Shymkent qalasynyń ákimi Murat Áıtenov jergilikti atqarýshy organnyń jumysyna serpin beretin birqatar sheshimder qabyldanǵanyn, qalanyń ári qaraı damý saıasatyn júzege asyrýǵa yqpal etetin mańyzdy máselelerdi atady.
– Bıýdjetti naqtylaý barysynda qarjy negizinen qalanyń áleýmettik-ekonomıkalyq damýyna oń áser etetin, turǵyndardy tolǵandyratyn máselelerin sheshýge baǵyttaldy. Onyń ishinde «Nur Otan» partııasynyń saılaýaldy baǵdarlamasyna sáıkes, qalanyń ınjenerlik-ınfraqurylymdyq júıesin damytýǵa basymdyq berilýde. Sonymen qatar, kópqabatty turǵyn úı, aýlalardy abattandyrý, buqaralyq sportty damytý maqsatynda shaǵynaýdandarda ámbebap sport alańdaryn ornatý josparlandy. Aıta ketsek, 101 sport alańshasy salynady. Bul – úlken jetistik. Bul jumystar jekemenshik ınvestorlar esebinen atqarylýda. Osy jumystardyń nátıjesinde árbir shaǵynaýdanda sport alańshalary bolady. Bıyl «Shymkent jastar» lıgasyn ótkizdik. Bul jobaǵa balalardyń qyzyǵýshylyǵy artyp otyr. 8 myńdaı bala osy jarysqa qatysty. Basty jetistik – balalardyń qyzyǵýshylyǵyn arttyrdyq, – dedi qala ákimi.
Sonymen birge, sessııada QR memlekettik josparlaý júıesine sáıkes, Shymkent qalasynyń 2021-2025 jyldarǵa arnalǵan damý baǵdarlamasy bekitildi.
Qala ákimi bıyl jyl basynan beri qalanyń negizgi kórsetkishterinde oń ósim baryn aıtyp, jumystardy odan ári kúsheıtý qajettigin atap ótti.
Shymkent qalasy ákimdiginiń baspasóz qyzmeti
