Adamgershilikti bıik ustap, kisilikti tý etip, jany jaraly jannyń jasyn súrtip, jyly lebizin aıamaı, qoldan kelgen járdemin usynyp júrgen jaqsy jandar týraly da jıi aıtylady búgingi qoǵamda. Aýdanymyzǵa qarasty Gúldala aýylyndaǵy áıelder qaýymynyń tóraıymy Aıshıgýl Tohtıeva da - qaıyrymdy jandar qataryn toltyryp júrgen keń júrekti ana. Qashanda ıgi bastamalarǵa muryndyq bolyp júretin jan 1 maýsym – Balalardy qorǵaý kúni meıramyna oraı taǵy bir qaıyrymdy iske sebepshi boldy.
Aýyldaǵy «Nazýgým» tobynyń ujymy men aýyl belsendileriniń demeýshiligimen otyz múmkindigi shekteýli balaǵa merekelik kesh uıymdastyryp berdi. Igi sharaǵa aýdandyq Qoǵamdyq kelisim keńesiniń tóraıymy Jumaqyz Butabaeva, Qazaqstan Respýblıkasynyń uıǵyr etnomádenı ortalyǵynyń janynan qurylǵan Analar keńesiniń tóraıymy Zorabývı Aýtova, «Janan» fondynyń prezıdenti Mızangýl Avamýslımova, aýdandyq uıǵyr etnomádenı ortalyǵy janyndaǵy áıelder keńesiniń tóraıymy Kamınýr Sopıeva men orynbasary Gýlbaný Bakıeva, Gúldala aýyldyq meshitiniń ımamy Ismaıljan Bakıev, aýdandyq uıǵyr etnomádenı ortalyǵynyń tóraǵasy Imın Tohtahýnovtar arnaıy shaqyrylǵan edi. Merekelik kesh Besaǵash aýylynda oryn tepken «Sanraız» meıramhanasynda ótti. Keń zalǵa jaıylǵan mol dastarhan basyna jaıǵasqan balalar men ata-analarǵa konerttik baǵdarlama usynyldy. Balalar arasynda óner baıqaýy uıymdastyrylyp, balalardyń biri án salsa, biri bı bılep, endi biri óleń oqydy. Alla balalardy múmkindigin shektep bir synasa da, boılaryna talantty tógip berip shapaǵatyn tógetini de ras. Arbaǵa tańylsa da júrek tebirenter ánderin shyrqap, óleńin oqyǵan balalarǵa dán rıza boldyq. Baıqaý jeńimpazdaryna túrli baǵaly syılyqtar tabys etildi. Merekelik sharaǵa shaqyrylǵan barlyq balaǵa demeýshiler tarapynan táttige toly dorbalar men karaoke mıkrafondar syıǵa tartyldy. Bul kúngi keshte úlken de, kishi de dastarhannan dám tatyp, konert tamashalap, kóterińki kóńil-kúıde tarqasty.
Perızat Aýǵanbaıqyzy
