Bıyl Qadir túninde meshitte oryndalatyn dinı rásimder onlaın rejımde ótedi. Bul týraly Qazaqstan musylmandary dinı basqarmasy málimdedi, dep habarlaıdy "Adyrna" ulttyq portaly Sputnik Qazaqstan saıtyna silteme jasap.
"Elimizdegi jáne álemdegi kóptegen qoǵamdyq is-shara men jıyndar onlaın rejımde ótip jatyr. Onyń basty sebebi pandemııalyq jaǵdaıdy odan saıyn kúrdelendirmeý ekeni belgili. Óıtkeni juqpaly dertpen oqshaýlaný arqyly ǵana kúresýdiń mańyzy kún saıyn artýda. Qazaqstan musylmandary dinı basqarmasy elimizdegi pandemııalyq jaǵdaıdy eskerip, qaýipti derttiń taralýyn aldyn alý úshin qasıetti Qadir túninde meshitte oryndalatyn dinı rásimder onlaın rejimde ótetinin habarlaıdy", - delingen dinı basqarma taratqan aqparatta.
Sondaı-aq din salasynyń mamandary Qadir keshin úıde ótkizýge shaqyrdy. Halyqtyń densaýlyǵy men ómiri bárinen qymbat qundylyq bolǵandyqtan, osyndaı ýaqytsha sheshimdi durys qabyldaýlaryńyzdy jáne tártipke baǵynýlaryńyzdy suraımyz, dedi basqarma ókilderi.
Oqı otyryńyz: Qazaqstanda juma namazyn oqýǵa ruqsat berildi
Osylaısha Qadir túninde otandyq telearnalar men "Halyq arna", "Hıkmet TV" jáne muftyat.kz saıtynyń áleýmettik jelidegi paraqshalarynda arnaıy onlaın baǵdarlama kórsetiledi.
"Qasıeti mol qadir túni" onlaın baǵdarlamasynda belgili ǵalymdar ýaǵyz-nasıhat aıtady. Sondaı-aq Quran hatym duǵasyna qatysýǵa múmkindik bar.
Sonymen qatar qazaqstandyqtar dinı basqarma janyndaǵy aqparat berý ortalyǵynan 8 7172 33 30 30 nómirine habaralasyp, táýlik boıy qyzyqtyrǵan saýaldy qoıa alady.
Aıta keteıik, 2021 jyly Ramazan aıy 13 sáýirde bastaldy. Qasıetti aı 12 mamyrǵa deıin jalǵasady. 8 mamyrdan 9 mamyrǵa qaraǵan tún – Qadir túni.
