Túrkimenstanda Qadir túnine oraı sottalǵandarǵa raqymshylyq jasalady, dep habarlaıdy "Adyrna" tilshisi.
El prezıdenti Serdar Berdimuhamedov raqymshylyq jasaý týraly jarlyqqa qol qoıdy.
29 naýryzda Túrkimenstan prezıdenti Serdar Berdimuhamedov úkimettiń áleýmettik-ekonomıkalyq damý máselelerine arnalǵan otyrysynda dástúr boıynsha qasıetti «Gadır Gıdjesı» túni, ıaǵnı Qadir túni qurmetine, buryn sottalǵan 356 azamatqa raqymshylyq jasaý týraly jarlyqqa qol qoıdy.
Respýblıka basshysy Qaýipsizdik keńesiniń hatshysy Begench Gýndogdyevke quqyq qorǵaý organdarynyń basshylarymen birlesip, bostandyqqa shyqqan azamattardyń úıinde otbasymen birge bolýy úshin qajetti jumystardy júrgizýdi tapsyrdy.
Sondaı-aq, Memleket basshysy oblys, aýdan, qalalardyń basqarma basshylaryna raqymshylyq jasalǵan adamdardy jumyspen qamtýdy qamtamasyz etý jóninde tapsyrmalar berdi.
