بيىل قادىر تۇنىندە مەشىتتە ورىندالاتىن ءدىني راسىمدەر ونلاين رەجيمدە وتەدى. بۇل تۋرالى قازاقستان مۇسىلماندارى ءدىني باسقارماسى مالىمدەدى، دەپ حابارلايدى "ادىرنا" ۇلتتىق پورتالى Sputnik قازاقستان سايتىنا سىلتەمە جاساپ.
"ەلىمىزدەگى جانە الەمدەگى كوپتەگەن قوعامدىق ءىس-شارا مەن جيىندار ونلاين رەجيمدە ءوتىپ جاتىر. ونىڭ باستى سەبەبى پاندەميالىق جاعدايدى ودان سايىن كۇردەلەندىرمەۋ ەكەنى بەلگىلى. ويتكەنى جۇقپالى دەرتپەن وقشاۋلانۋ ارقىلى عانا كۇرەسۋدىڭ ماڭىزى كۇن سايىن ارتۋدا. قازاقستان مۇسىلماندارى ءدىني باسقارماسى ەلىمىزدەگى پاندەميالىق جاعدايدى ەسكەرىپ، قاۋىپتى دەرتتىڭ تارالۋىن الدىن الۋ ءۇشىن قاسيەتتى قادىر تۇنىندە مەشىتتە ورىندالاتىن ءدىني راسىمدەر ونلاين رەجىمدە وتەتىنىن حابارلايدى", - دەلىنگەن ءدىني باسقارما تاراتقان اقپاراتتا.
سونداي-اق ءدىن سالاسىنىڭ ماماندارى قادىر كەشىن ۇيدە وتكىزۋگە شاقىردى. حالىقتىڭ دەنساۋلىعى مەن ءومىرى بارىنەن قىمبات قۇندىلىق بولعاندىقتان، وسىنداي ۋاقىتشا شەشىمدى دۇرىس قابىلداۋلارىڭىزدى جانە تارتىپكە باعىنۋلارىڭىزدى سۇرايمىز، دەدى باسقارما وكىلدەرى.
وقي وتىرىڭىز: قازاقستاندا جۇما نامازىن وقۋعا رۇقسات بەرىلدى
وسىلايشا قادىر تۇنىندە وتاندىق تەلەارنالار مەن "حالىق ارنا", "حيكمەت تۆ" جانە muftyat.kz سايتىنىڭ الەۋمەتتىك جەلىدەگى پاراقشالارىندا ارنايى ونلاين باعدارلاما كورسەتىلەدى.
"قاسيەتى مول قادىر ءتۇنى" ونلاين باعدارلاماسىندا بەلگىلى عالىمدار ۋاعىز-ناسيحات ايتادى. سونداي-اق قۇران حاتىم دۇعاسىنا قاتىسۋعا مۇمكىندىك بار.
سونىمەن قاتار قازاقستاندىقتار ءدىني باسقارما جانىنداعى اقپارات بەرۋ ورتالىعىنان 8 7172 33 30 30 نومىرىنە حابارالاسىپ، تاۋلىك بويى قىزىقتىرعان ساۋالدى قويا الادى.
ايتا كەتەيىك، 2021 جىلى رامازان ايى 13 ساۋىردە باستالدى. قاسيەتتى اي 12 مامىرعا دەيىن جالعاسادى. 8 مامىردان 9 مامىرعا قاراعان ءتۇن – قادىر ءتۇنى.
