Qazaq zııalylary Eskendir Hasanǵalıevke "Eńbek eri" ataǵyn berýdi usyndy, - dep habarlaıdy "Adyrna" ulttyq portaly Tengrinews.kz saıtyna siltep.
"Habar" telearnasyndaǵy "Búgin" baǵdarlamasynyń 4 sáýirdegi shyǵarylymy Qazaqstannyń halyq ártisi, ánshi, kompozıtor Eskendir Hasanǵalıevke arnaldy. Stýdııada jınalǵan zııaly qaýym Hasanǵalıevti eske alyp, eńbegin joǵary baǵalaý haqynda sóz qozǵady.
"Kompozıtor, óner qaıratkeri, óner adamy, elin súıetin azamat, memleketshil azamat qandaı bolý kerek - mine, Eskendir Hasanǵalıev osyǵan jarqyn úlgi boldy. Ol kisiniń eńbegi sheksiz, bir ǵana "Atamekenniń" ózi Alty alashtyń beıresmı ánurany dep aıtsaq bolady. Ónerde sabaqtastyq degen dúnıe bar. Meniń uǵymymda Eskendir aǵa Muhıt babamyz, Aqan seri, Birjan sal, Mádı, Estaı, bertindegi Isa Baızaqov, Ǵarıfolla Qurmanǵalıev, Kenen Ázirbaevtardyń laıyqty jalǵasy. Sonymen qatar, ózindik ereksheligi Eskendir aǵa án jazyp qana qoımady, ol lırıkalyq barıton daýysty ánshi-kompozıtor. Iaǵnı, sal-serilerden qalǵan mektep degen - sol", - dedi Maemırov.
Ashat Maemırov Eskendir Hasanǵalıevtiń ánderin úsh topqa bóldi: patrıottyq, rýhanı qundylyqtar týraly jáne lırıkalyq ánder men romanstar.
"Eskendir aǵa ólmeıtin, ómirsheń ánder, úlken mura qaldyrdy, endigi maqsat - onyń jalǵasýy. Bir ókinishtisi, osyndaı urandy ánderdi jazǵan Eskendir aǵa naǵyz Halyq Qaharmanyna laıyqty tulǵa edi, "Eńbek eri qandaı?" dese men Eskendir Hasanǵalıevti kórseter edim", - dedi ol.
Sonymen qatar, Eskendir Hasanǵalıevke "Eńbek eri" ataǵyn berýdi memleket jáne qoǵam qaıratkeri Baqtyqoja Izmuhambetov te usyndy.
"Kez kelgen adam oqıdy, úırenedi, mamandyǵy boıynsha jumys isteıdi. Biraq, án jazý, halyqty tyńdatyp, úlken sahnada oryndaý kez kelgen adamnyń qanyna bitpegen nárse, ol qansha oqysa da paıda bolmaıdy. Úlken talant ıesi, belgili azamattardyń biri Eskendir aǵamyz boldy. Aǵamyzdy qalaı maqtasaq ta, qasıetin, bedelin, eńbegin qandaı dárejede aıtsaq ta jetkize almaspyz. Sondyqtan, Eskendir Hasanǵalıevke "Qazaqstannyń Eńbek eri" ataǵyn berýdi usynamyn jáne bul usynys keńinen qoldaý tapsa eken deımin. Elge osynsha eńbegi sińip, qazaq ónerine osynsha úles qosyp, eńbek qaldyrǵan azamat sol dárejege laıyq dep oılaımyn", - dedi Izmuhambetov.
Bul usynysty Qazaqstan kompozıtorlar odaǵynyń tóraǵasy Serikjan Ábdinurov pen Qazaqstannyń eńbek sińirgen artısi, ánshi Baǵdat Sámedınova da qoldady.
Tengrinews.kz tilshisi bul usynysqa qatysty Eskendir Hasanǵalıevtiń uly Birjan Hasanǵalıevtiń pikirin bildi.
"Asyl ákemniń eńbegin baǵalap, aıtylyp jatqan usynysty telearnadan kórdim. Mundaı talantty, daryndy adamdy tiri kezinde baǵalasa, úlken marapat berse ol úshin eń úlken baqyt bolar edi. Osydan 15 jyl buryn berse de eshbir jan, eshbir qazaq "bul kisi mundaı joǵary marapatqa laıyqty emes", dep aıtpas edi, kerisinshe, qýanar edi. Biraq, ókinishke qaraı ákem ómirden ketip qaldy, ózi ketse de artynda mura qaldy - qazaq halqyna syılaǵan ánderi, úni, daýysy. Sondyqtan, "Eńbek eri" degen ataqty meniń oıymsha, berý kerek, bul degenińiz ádildiktiń eń joǵary satysy bolar dep esepteımin", - dedi Birjan Hasanǵalıev.
Eske salaıyq, 30 sáýirde ataqty ánshi jáne kompozıtor Eskendir Hasanǵalıev 82 jasyna qaraǵan shaǵynda qaıtys boldy.
"Adyrna" ulttyq portaly
(foto:instagram eskendir_khassangaliev)
