ەسكەندىر حاسانعاليەۆكە "ەڭبەك ەرى" اتاعىن بەرۋ ۇسىنىلدى

6811
Adyrna.kz Telegram

قازاق زيالىلارى ەسكەندىر حاسانعاليەۆكە "ەڭبەك ەرى" اتاعىن بەرۋدى ۇسىندى، - دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەپ.

"حابار" تەلەارناسىنداعى "بۇگىن" باعدارلاماسىنىڭ 4 ساۋىردەگى شىعارىلىمى قازاقستاننىڭ حالىق ءارتىسى، ءانشi, كومپوزيتور ەسكەندىر حاسانعاليەۆكە ارنالدى. ستۋديادا جينالعان زيالى قاۋىم حاسانعاليەۆتى ەسكە الىپ، ەڭبەگىن جوعارى باعالاۋ حاقىندا ءسوز قوزعادى.

قازاقستاننىڭ ەڭبەك سىڭىرگەن قايراتكەرى، تەاتر رەجيسسەرى اسحات ماەميروۆتىڭ ايتۋىنشا، ەسكەندىر حاسانعاليەۆ قالدىرعان مۇرا شەكسىز، سوزبەن ايتىپ تاۋىسۋ مۇمكىن ەمەس.

"كومپوزيتور، ونەر قايراتكەرى، ونەر ادامى، ەلىن سۇيەتىن ازامات، مەملەكەتشىل ازامات قانداي بولۋ كەرەك - مىنە، ەسكەندىر حاسانعاليەۆ وسىعان جارقىن ۇلگى بولدى. ول كىسىنىڭ ەڭبەگى شەكسىز، ءبىر عانا "اتامەكەننىڭ" ءوزى التى الاشتىڭ بەيرەسمي ءانۇرانى دەپ ايتساق بولادى. ونەردە ساباقتاستىق دەگەن دۇنيە بار. مەنىڭ ۇعىمىمدا ەسكەندىر اعا مۇحيت بابامىز، اقان سەرى، ءبىرجان سال، ءمادي، ەستاي، بەرتىندەگى يسا بايزاقوۆ، عاريفوللا قۇرمانعاليەۆ، كەنەن ازىرباەۆتاردىڭ لايىقتى جالعاسى. سونىمەن قاتار، وزىندىك ەرەكشەلىگى ەسكەندىر اعا ءان جازىپ قانا قويمادى، ول ليريكالىق باريتون داۋىستى ءانشى-كومپوزيتور. ياعني، سال-سەرىلەردەن قالعان مەكتەپ دەگەن - سول", - دەدى ماەميروۆ.

اسحات ماەميروۆ ەسكەندىر حاسانعاليەۆتىڭ اندەرىن ءۇش توپقا ءبولدى: پاتريوتتىق، رۋحاني قۇندىلىقتار تۋرالى جانە ليريكالىق اندەر مەن رومانستار.

"ەسكەندىر اعا ولمەيتىن، ومىرشەڭ اندەر، ۇلكەن مۇرا قالدىردى، ەندىگى ماقسات - ونىڭ جالعاسۋى. ءبىر وكىنىشتىسى، وسىنداي ۇراندى اندەردى جازعان ەسكەندىر اعا ناعىز حالىق قاھارمانىنا لايىقتى تۇلعا ەدى، "ەڭبەك ەرى قانداي؟" دەسە مەن ەسكەندىر حاسانعاليەۆتى كورسەتەر ەدىم", - دەدى ول.

سونىمەن قاتار، ەسكەندىر حاسانعاليەۆكە "ەڭبەك ەرى" اتاعىن بەرۋدى مەملەكەت جانە قوعام قايراتكەرى باقتىقوجا ىزمۇحامبەتوۆ تە ۇسىندى.

"كەز كەلگەن ادام وقيدى، ۇيرەنەدى، ماماندىعى بويىنشا جۇمىس ىستەيدى. بىراق، ءان جازۋ، حالىقتى تىڭداتىپ، ۇلكەن ساحنادا ورىنداۋ كەز كەلگەن ادامنىڭ قانىنا بىتپەگەن نارسە، ول قانشا وقىسا دا پايدا بولمايدى. ۇلكەن تالانت يەسى، بەلگىلى ازاماتتاردىڭ ءبىرى ەسكەندىر اعامىز بولدى. اعامىزدى قالاي ماقتاساق تا، قاسيەتىن، بەدەلىن، ەڭبەگىن قانداي دارەجەدە ايتساق تا جەتكىزە الماسپىز. سوندىقتان، ەسكەندىر حاسانعاليەۆكە "قازاقستاننىڭ ەڭبەك ەرى" اتاعىن بەرۋدى ۇسىنامىن جانە بۇل ۇسىنىس كەڭىنەن قولداۋ تاپسا ەكەن دەيمىن. ەلگە وسىنشا ەڭبەگى ءسىڭىپ، قازاق ونەرىنە وسىنشا ۇلەس قوسىپ، ەڭبەك قالدىرعان ازامات سول دارەجەگە لايىق دەپ ويلايمىن", - دەدى ىزمۇحامبەتوۆ.

بۇل ۇسىنىستى قازاقستان كومپوزيتورلار وداعىنىڭ توراعاسى سەرىكجان ءابدىنۇروۆ پەن قازاقستاننىڭ ەڭبەك سىڭىرگەن ءارتيسى، ءانشى باعدات سامەدينوۆا دا قولدادى.

Tengrinews.kz ءتىلشىسى بۇل ۇسىنىسقا قاتىستى ەسكەندىر حاسانعاليەۆتىڭ ۇلى ءبىرجان حاسانعاليەۆتىڭ پىكىرىن ءبىلدى.

"اسىل اكەمنىڭ ەڭبەگىن باعالاپ، ايتىلىپ جاتقان ۇسىنىستى تەلەارنادان كوردىم. مۇنداي تالانتتى، دارىندى ادامدى ءتىرى كەزىندە باعالاسا، ۇلكەن ماراپات بەرسە ول ءۇشىن ەڭ ۇلكەن باقىت بولار ەدى. وسىدان 15 جىل بۇرىن بەرسە دە ەشبىر جان، ەشبىر قازاق "بۇل كىسى مۇنداي جوعارى ماراپاتقا لايىقتى ەمەس", دەپ ايتپاس ەدى، كەرىسىنشە، قۋانار ەدى. بىراق، وكىنىشكە قاراي اكەم ومىردەن كەتىپ قالدى، ءوزى كەتسە دە ارتىندا مۇرا قالدى - قازاق حالقىنا سىيلاعان اندەرى، ءۇنى، داۋىسى. سوندىقتان، "ەڭبەك ەرى" دەگەن اتاقتى مەنىڭ ويىمشا، بەرۋ كەرەك، بۇل دەگەنىڭىز ادىلدىكتىڭ ەڭ جوعارى ساتىسى بولار دەپ ەسەپتەيمىن", - دەدى ءبىرجان حاسانعاليەۆ.

ەسكە سالايىق، 30 ساۋىردە اتاقتى ءانشى جانە كومپوزيتور ەسكەندىر حاسانعاليەۆ 82 جاسىنا قاراعان شاعىندا قايتىس بولدى.

"ادىرنا" ۇلتتىق پورتالى

(فوتو:instagram eskendir_khassangaliev)

پىكىرلەر