Halyqaralyq karate federaııasy (WKF) júrgizgen reıtıngi boıynsha ótken jyly shymkenttik sportshy Darhan Asadilov álemdik reıtıng boıynsha eń úzdik karateshilerdiń kóshin bastaǵan.
Ol 60 kelige deıingi salmaqta 9517 upaımen úzdikter qatarynan kóringen. Asadilovtiń basty qarsylastary Andjelo Krechenzo (Italııa) men Shamdan Eraı (Túrkııa) ekinshi jáne úshinshi orynda bolǵan.
⠀
Búginde 60 keli salmaq dárejesinde óner kórsetetin jerlesimiz Olımpıadalyq reıtıngte kósh (600 sportshynyń arasynda) basynda turǵandyqtan, XXXII-jazǵy Olımpıada Oıyndarynyń joldamasyn merziminen buryn ıelendi. Aıta keteıik, Tokıo Olımpıadasyna karate sport túri alǵash ret enip otyr.
Darhan Asadilov óziniń sporttyq jolynda 11 Premer-lıgaǵa qatysyp, onyń segizinde jeńiske jetken. Ol 1987 jyly týylǵan. Boıy 165 sm. Jeke jattyqtyrýshysy Sh.Qajymuqan. Sporttyq ataǵy Qazaqstan Respýblıkasynyń halyqaralyq dárejedegi sport sheberi.
Shymkent qalasy ákimdiginiń baspasóz qyzmeti
