Şymkent qalasynda jūmyspen qamtu qarqyndy jürgızılude. Uaqytşa jūmysqa ornalasqan azamattardyŋ bırı – Izet Aitqūl.
Q.Jūbanov atyndaǧy Aqtöbe öŋırlık memlekettık universitetın «Mūnai-gaz ısı» mamandyǧy boiynşa tämamdaǧan jas maman bıraz uaqyt jūmyssyz jürgen. 2021 jyldyŋ basynda qalalyq jūmyspen qamtu ortalyǧynda «jūmyssyz» märtebesımen tırkelıp, köp ūzamai «Jastar resurstyq ortalyǧy» KMM-ne qoǧamdyq kömekşı qyzmetıne joldandy.
– Jūmyssyz jürgen azamattarǧa memleket tarapynan türlı baǧyttaǧy baǧdarlamalar ūsynylyp otyr. Eŋbek etkısı keletın adamǧa qai kezde bolsa da jūmys tabylady. Men de sol ūstanymdy qoldaimyn. Uaqytşa bolsa da jūmysqa ornalasyp, tabys tauyp jürmın, – deidı 22 jastaǧy baǧdarlama qatysuşysy.
Biyl qoǧamdyq jūmyspen 2 778 adam türlı mekemeler men käsıporyndarǧa joldandy. Jospar artyǧymen oryndalyp, uaqytşa jūmysqa joldama beru äzırge toqtatylǧan.
Uaqytşa jūmys orny bolyp eseptelınetın «Qoǧamdyq jūmys» aldyn-ala käsıptık daiarlaudy talap etpeidı jäne äleumettık baǧytqa ie.
Tūraqty jūmys tauyp, ornalasudyŋ jolyn aşatyn baǧdarlamalar jalǧasyn tabady.
Şymkent qalasy äkımdıgınıŋ baspasöz qyzmetı
