Qala ákimi elimizdegi eń damýshy kompanııalardyń biri «NURTAU distribution company» JShS-nyń jumysymen tanysty.
Atalǵan kásiporyn «Tassaı» ındýstrıaldy aımaǵynda 1,2 gektar aýmaqta ornalasqan. Shokoladty kámpıt jáne saǵyz óndirýmen aınalysady. 60 jańa jumys ornyn quryp, 2019-2020 jyldary qurylysy júrgizilip, bıyl 100 % iske qosylyp otyr.
Jańa kásiporynnyń óndiristik qýaty jylyna 1,15 mln. dana shokolad kámpıtin, 1,8 mln. dana saǵyz kámpıtin quraıdy. Sondaı-aq, mekemeniń Qazaqstan Respýblıkasynyń barlyq qalalarynda ókilderi, saýda komandasy men alańdary bar.
Kompanııanyń negizgi aýdıtorııasy - balalar. Sondyqtan «Orbıt» emes, saǵyz kámpıtter satylady. 12 túrli assortımenti bar. Mysaly, alma, banan, tańqýraı dámimen usynylady. Bul kámpıtter men saǵyzdar Shymkentte óndiriletin bolǵandyqtan, sheteldik analogtardan 10% arzan bolady.
Ónimder «MEXXI» ataýymen shyǵarylady. Jergilikti bazarlar men barlyq dúkenderden alýǵa bolady. 70 paıyzy ishki naryqta, 30 paıyzy eksportqa jóneltiledi.
Shymkent qalasynyń ákimi jumysshylarmen tildesip, jaǵdaılarymen tanysty.
- Pandemııa úlkendi-kishili barlyq kásipkerlik nysandarǵa óziniń áserin tıgizdi. Bul ózin-ózi damytyp otyrǵan mekemeniń biregeıi. Sondyqtan budan ári ónim túrlerin arttyryp, mekemeni keńeıtý maqsatynda barynsha qoldaý kórsetetin bolamyz. Óndirilgen ónimderdiń qaladaǵy saýda úılerinde satylýyna jaǵdaı jasaý kerek, - dep sala basshysyna tapsyrma berdi.
Aıta ótý kerek, mundaǵy mamandardyń keıbireýleri jańa jabdyqta jumys isteý úshin arnaıy oqytýdan ótken. Aldaǵy ýaqytta kompanııa júgeriden jasalǵan, karamel jáne taıaqshadaǵy qatty kámpıtter óndiretin jelilerdi iske qosýdy kózdep otyr.
Shymkent qalasy ákimdiginiń baspasóz qyzmeti
