21 naýryz kúni Abaı aýdany aýmaǵynda ornalasqan "Samal-3" 110/10kVA elektr taratý qosalqy stanııasynda bolǵan aqaý saldarynan órt shyqqan.
Apat saldarynan qalanyń 21 myń abonenti («Nurtas», «Nursát», «Shymsıtı», «Nıýsıtı AD», «Soltústik-Batys», «Samal-3», «Asar» shaǵynaýdandary, Kókjaılaý TK, Tólemetov kóshesindegi kópqabatty úıler) jaryqsyz qaldy.
Órt ornyna tótenje jaǵdaılar departamentiniń 27 qyzmetkeri, "Ońtústik jaryq tranzıt" JShS-nen 15 adam, "Qýat jylý" MKK-dan 22 adam, 14 dana tehnıka shuǵyl jumyldyryldy.
Qazirgi tańda órt tolyǵymen sóndirilip, elektr jaryǵyn qaıta qosý jumystary júrgizilýde.
Oqıǵa ornyna qala ákimi Murat Áıtenov baryp, turǵyndarǵa jaryqtyń jyldam berilýin qadaǵalaýda.
Shuǵyl is-qımyldyń arqasynda "Nurtas", "Shymsıtı", "Nursat", ÁIO, "Soltústik-batys, Aqjaıyq shaǵyn aýdandaryna elektr qýaty ózge qosalqy stansadan qaıta berildi. Ázirge qosylmaı turǵany Samal-3, Asar aýdany jáne Tólemetov kóshesindegi kópqabatty úıler. Bul abonentterdi qosý jumystary shuǵyl júrgizilip jatyr.
Jaryqtyń berilýine tikeleı jaýapty Energetıka jáne kommýnaldyq sharýashylyq basqarmasy, "Ońtústik jaryq tranzıt" JShS-si jáne "Qýat jylý ortalyǵy-3" MKK basshylyǵy ár eki saǵat saıyn aqparat berip otyrady.
Qala turǵyndary kezeń-kezeńimen 2 kún ishinde jaryqpen tolyq qamtamasyz etiledi. Al jaryq berý stansasynda bolǵan apatty jaǵdaıdy qalpyna keltirý úshin shamamen 20 kún ýaqyt ketedi.
Elektr qýatyn iske qosý jumystaryna osy kezde 45 adam jumyldyrylǵan.
Shahar basshysy turǵyndarǵa sabyrlylyq tanytyp, túsinistikpen qaraýǵa shaqyrdy. Jáne jaýapty sala qyzmetkerlerine merekege qaramaı, táýlik boıy qalpyna keltirý jumystaryn toqtatpaı, jaryqtyń qosylýyn barynsha tezdetýin tapsyrdy.
Shymkent qalasy ákimdiginiń baspasóz qyzmeti
