Shymkenttegi «Túrkistan» saraıynda Ulystyń Uly kúni Naýryz merekesi aıasynda «Naýryz Gúl kóktem, jyl basy» respýblıkalyq aqyndar aıtysy bastaldy. Qala ákiminiń qoldaýymen uıymdastyrylyp otyrǵan dúbirli dodaǵa elimizdiń aıtýly 16 aqyny qatysyp otyr.
Búgingi júırikterdiń sóz saıysyna Shymkent qalasynan N.Esenqulov, Q.Bildásh, Q.Abzalov qatyssa, elimizdiń bas qalasy Nur-Sultannan R.Haıdarov, E.Qaınazarov, al, Almaty qalasynan Sh.Sezimhan, Almaty oblysynan Q.Berdihan, Qyzylordadan M.Sultanhan, Qostanaıdan A.Qalıev, Qaraǵandydan T.Jamanov, Aqtóbeden A.Kerimbek, Shyǵys Qazaqstannan A.Jeńishazın, Túrkistan oblysynan B.Shoıbekov, Soltústik Qazaqstannan A.Shuǵataev, Batys Qazaqstannan B.Shıirmeduly syndy birtýar aqyndarymyz kelip baq synaýda.
Aıtys alamanynda qazylar alqasynyń tóraǵasy- KSRO Halyq ártisi, «Otan», «Qurmet», «Qazaqstannyń eńbek eri» ordenderiniń ıegeri, qazaq rýhanııatynyń ardageri Asanáli Áshimov bolsa, Qazaqstannyń Halyq aqyny, Jambyl Jabaev atyndaǵy syılyqtyń jáne «Parasat» ordeniniń ıegeri Áselhan Qalybekova, QR Eńbek sińirgen qaıratkeri, «Qurmet», «Parasat» ordenderiniń ıegeri, Halyqaralyq «Alash» syılyǵynyń laýreaty, jazýshy Marhabat Baıǵut, Qazaqstan Jazýshylar Odaǵynyń múshesi, aqyn, jýrnalıst, QR eńbegi sińgen qyzmetkeri, «Alash», «Parasat» ordenderiniń ıegeri Hanbıbi Esenqaraqyzy men aıtysker aqyndar Baýyrjan Ergenuly, Esjanova Marjan, Karıma Oralova syndy azamattar qazylyq etýde.
Eki kúnge jalǵasatyn aqyndar aıtysynyń júlde qory 5 mln teńgeni quraıdy. Máselen, Bas júlde ıegerine -2 mln. teńge bolsa, 1 oryn -1 mln. teńgeni quraıdy. Al ekinshi oryn alǵan 2 aqynǵa -500 myń teńgeden, 3 oryn alǵan eki aqynǵa -300 myń teńge beriletin bolady.
Túrkistan saraıynda barlyq sanıtarlyq normalar saqtalǵan. Kórermender sany ár kúni 100 adamnan aspaıdy.
Shymkent qalasy ákimdiginiń baspasóz qyzmeti
