Shymkentke kóship kelgen qandastar qalalyq jumyspen qamtý jáne áleýmettik qorǵaý basqarmasyna qarasty «Qandastardy beıimdeý jáne yqpaldastyrý ortalyǵynda» alty aı boıy turady. Osy ýaqyt aralyǵynda ortalyqta qandastardyń elge beıimdelýi úshin birneshe qyzmet túrleri kórsetiledi.
Munda ata jurtyn ańsap kelgen aǵaıynǵa aldymen qazaqy salt-dástúrlerimiz ben ulttyq qundylyqtarymyz nasıhattalady. Qyzmetkerler túp-tamyrymyzdy tanýǵa múmkindik beretin túrli ádet-ǵuryptardy dáriptep, túrli ulttyq as mázirin, qazaqy turmys-tirshilikti dáripteıdi. Bul olardyń elge tez beıimdelip ketýine oń áser etip, baǵa jetpes qundylyqtarymyzdy baǵamdaýǵa múmkindik beredi.
Al psıhologtar túrli trenıngter uıymdastyryp, árqaısysymen jeke jumys júrgizedi. Sondaı-aq, zańgerler qandastarǵa quqyqtyq turǵydan kómek kórsetip, negizgi zańnamalardy túsindiredi. Onymen qosa qandastardy túrli mamandyqtar boıynsha qysqa merzimdi oqytý kýrstaryna baýlyp, jumysqa ornalasýyna da yqpal etedi.
Aıta keteıik, búgingi tańda ortalyqta 12 otbasy turyp jatyr. Jyl basynan beri qalaǵa kóship kelgen 300-den astam múshesi bar 227 otbasyna qandas mártebesi berildi.
Shymkent qalasy ákimdiginiń baspasóz qyzmeti
