Shymkent qalasynyń ákimi Murat Áıtenov karantın sharalaryn eskere otyryp, qala turǵyndarynyń jeke suraqtary boıynsha onlaın qabyldaý ótkizdi.
Qashyqtyqtan ótken qabyldaýda shahar turǵyndary turǵyn úı, kommýnaldyq sala men áleýmettik tólem alý máselesin kóterdi. Onǵa tarta qala turǵynynyń ótinishterin tyńdaǵan Murat Áıtenov aıtylǵan máseleler qoldanystaǵy zań aıasynda qaralyp, osynyń negizinde kómek kórsetiletinin alǵa tartty.
Atap aıtqanda Eńbekshi aýdanynyń turǵyny R.Dosybaeva jer teliminiń qyzyl syzyqta ekenin aıtyp, kómek kórsetýin surady. Qala ákimi atalǵan máseleni sheshý maqsatynda tıisti sala basshysyna egjeı-tegjeıli qarap, zań boıynsha sheshim shyǵarylýyn tapsyrdy. Odan ózge Ál-Farabı aýdanynyń turǵyny M.Ońalbaeva óziniń 1932 jyly týǵan anasyna baspana berýin ótindi. Azamatshanyń turǵyn úıge muqtaj azamattar tiziminde kópbalaly otbasy retinde osy jyly turǵany belgili boldy. Qazirgi tańda «Turǵyn úı qatynastary týraly» Zańyna sáıkes memlekettik turǵyn úı qorynan turǵyn úı belgilengen tártippen kezek arqyly beriletini jetkizildi.
Budan bólek, shahar basshysy memleket tarapynan berilip jatqan áleýmettik kómekterdi alý tártibi men baspana kezegine turý sharttarymen tanystyrdy. «Árbir másele meniń jiti baqylaýymda bolady» dep sózin qorytyndylady.
Sonymen qatar, aldaǵy mereke kúnderi turǵyndarǵa qaýipsizdik sharalaryn saqtap, karantın erejelerin qatań ustaný qajettigin aıtty.
Shymkent qalasy ákimdiginiń baspasóz qyzmeti
