Jańa jyl barsha jandy jarylqasyn! Búgin demalys. Kezekshimin. Tańǵy segizden jumystamyz. Barlyq memlekettik organdarda kezekshilik bar. Bir nárse bola qalsa, dereý habarlap, áreket etip, sheshim qabyldaıdy.
Bári tynysh bolsa, kitap oqyp, jazý jazyp otyrasyń. Sebebi demalys qoı
Qolym qyshyp, bolǵan-kórgendi jazǵym kelip turady. Sońǵy ýaqytta jazýǵa tegi qol tımeı ketti. Oıdaǵynyń onnan birin de jazyp úlgere almaı jatyrmyn.
Jańa jyldaǵy demalystardyń bir bóligin jazý-syzý men oqý-toqýǵa arnaımyn.
Aıtpaqshy, aldyńǵy kúni Shymkentte aıtarlyqtaı jańalyq boldy. Abaı jyly mazmundy qorytyndylandy ǵoı dep oılaımyn.
Ázimhan Isabek degen jas abaıtanýshy Abaı atamyzdyń shaǵataı tilinde jazylǵan 38-sóziniń syryn ashyp, tolyq nusqada kitap etip shyǵardy. Bul sózdi Abaı atamyz “Kıtab tasdıq” dep ataǵan. Bul kitap — Abaı shyǵarmashylyǵynyń ózegi.
Sodan keshe, 31 jeltoqsanda Shymkent qalasynyń ákimi Murat Áıtenov Memlekettik syılyqtyń laýreaty, kózi tiri bas abaıtanýshy desem qatespespin, Mekemtas Myrzahmetovke Jańa jyl aldynda sálem bere bardy. Aǵamyz azdap syrqattanyp qaldy degendi estip edik, qazir densaýlyǵy jaqsy eken.
Dastarhan basynda Mekemtas aǵamyz: “Qazir Shymkent Abaıtaný ortalyǵyna aınalyp barady”, — dep edi, Alash syılyǵynyń laýreaty, Mekemtas Myrzahmetov týraly bir kitap jazǵan, qazaqtyń belgili jazýshysy Marhabat Baıǵut aǵamyz: “Mekemtas Myrzahmetov qaıda barsa, Abaıtaný ortalyǵy sol jaqqa birge kóship barady”, — dep ázildesip biraz áńgimelestik. Áńgimelestik dep qoıamyz, Mekemtas aǵamyzdyń lekııasyn tyńdadyq.
Mekemtas aǵamyz jas urpaq Abaıdy mereıtoı jyldarynda ǵana emes, jyl saıyn oqyp úırený qajet ekenin amanattady.
Shyńǵys MUQAN
