Qazirgi tańda «Ǵarysh salasy» bizdiń elimiz úshin strategııalyq jaǵynan mańyzdy bolyp otyr. Osy saladaǵy otandastarymyzdyń jetken jetistikteri týraly sırek estımiz deýge de bolady. Qazaqstannyń ǵarysh salasynyń azdy kópti jańalyqtary týraly aqparatty oqyrmandarǵa usynýdy jón sanadyq.
Bizdiń elimizdiń ǵarysh salasy birneshe keshenderden turady. Birinshisi barlyǵymyz biletin, elimizdiń maqtanyshyna aınalǵan "Baıqońyr" ǵarysh aılaǵy. Baıqońyr ǵarysh aılaǵynda keıingi jyldary qurylǵan jerústi ınfraqurylymy, birqatar ǵylymı-zertteý ınstıtýttary, eki spýtnıktik toptamasy bar. Kelesisi eki jumys isteıtin spýtnıkten turatyn "KazSat" baılanys júıesi. Sońǵysynda jerdi qashyqtyqtan zondtaý júıesi jumys isteıdi, qazirgi ýaqytta onda úsh spýtnık bar.
Ǵarysh salasyndaǵy taǵy bir basty oqıǵa, ol 2019 jyldyń sońynda
Nur – Sultan qalasynyń mańyndaǵy ǵarysh apparattaryn qurastyrý - synaý keshenin iske qosý boldy. Qurastyrý - synaý kesheni - bul daıyndyq jumystary, synaqtar júrgiziletin kásiporyn bolyp tabylad Ol jerde ǵarysh tehnıkasynyń birqatar komponentteri jasalyp, qurastyrylady.
Bul negizinen adamdy ózine tartyp, qyzyqtyratyn joba. Bul jobanyń mańyzdylyǵy keıde óz deńgeıinde baǵalanbaı jatady. Atalǵan keshen arqyly Qazaqstannyń ǵarysh tehnıkasyn jasaý jónindegi jetekshi álemdik kompanııalardyń óndiristik tizbegine qosylý múmkindigi bar.
Qurastyrý - synaý kesheninde komponentter men ǵarysh apparattarynyń ózderi synalatyn erekshe stendterdi, kameralardy, stapelderdi kórýge bolady. Aıta keterlik jaıt, atalǵan keshen áıgili eýropalyq Airbus kompanııasymen yntymaqtasa otyryp qurylǵan jáne onyń júktemesi de Airbus kompanııasynyń tapsyrystarymen baılanysty bolady.
Ǵaryshtyq tehnıkanyń ereksheligi – onyń kólemi az bolǵanmen ony synaqtan ótkizip, jumys isteıtin jaǵdaıǵa jetkizý úshin qyrýar jumys pen mol ýaqyt jumsalady. Sondyqtan da kez kelgen eldiń ǵarysh salasynyń negizi, óziniń ulttyq synaq jáne stendtik bazasynyń bolýynda.
Erke Jomart,
«Adyrna» ulttyq portaly
