قازىرگى تاڭدا «عارىش سالاسى» ءبىزدىڭ ەلىمىز ءۇشىن ستراتەگيالىق جاعىنان ماڭىزدى بولىپ وتىر. وسى سالاداعى وتانداستارىمىزدىڭ جەتكەن جەتىستىكتەرى تۋرالى سيرەك ەستيمىز دەۋگە دە بولادى. قازاقستاننىڭ عارىش سالاسىنىڭ ازدى كوپتى جاڭالىقتارى تۋرالى اقپاراتتى وقىرماندارعا ۇسىنۋدى ءجون سانادىق.
ءبىزدىڭ ەلىمىزدىڭ عارىش سالاسى بىرنەشە كەشەندەردەن تۇرادى. ءبىرىنشىسى بارلىعىمىز بىلەتىن، ەلىمىزدىڭ ماقتانىشىنا اينالعان "بايقوڭىر" عارىش ايلاعى. بايقوڭىر عارىش ايلاعىندا كەيىنگى جىلدارى قۇرىلعان جەرۇستى ينفراقۇرىلىمى، بىرقاتار عىلىمي-زەرتتەۋ ينستيتۋتتارى، ەكى سپۋتنيكتىك توپتاماسى بار. كەلەسىسى ەكى جۇمىس ىستەيتىن سپۋتنيكتەن تۇراتىن "KazSat" بايلانىس جۇيەسى. سوڭعىسىندا جەردى قاشىقتىقتان زوندتاۋ جۇيەسى جۇمىس ىستەيدى، قازىرگى ۋاقىتتا وندا ءۇش سپۋتنيك بار.
عارىش سالاسىنداعى تاعى ءبىر باستى وقيعا، ول 2019 جىلدىڭ سوڭىندا
نۇر – سۇلتان قالاسىنىڭ ماڭىنداعى عارىش اپپاراتتارىن قۇراستىرۋ - سىناۋ كەشەنىن ىسكە قوسۋ بولدى. قۇراستىرۋ - سىناۋ كەشەنى - بۇل دايىندىق جۇمىستارى، سىناقتار جۇرگىزىلەتىن كاسىپورىن بولىپ تابىلاد ول جەردە عارىش تەحنيكاسىنىڭ بىرقاتار كومپونەنتتەرى جاسالىپ، قۇراستىرىلادى.
بۇل نەگىزىنەن ادامدى وزىنە تارتىپ، قىزىقتىراتىن جوبا. بۇل جوبانىڭ ماڭىزدىلىعى كەيدە ءوز دەڭگەيىندە باعالانباي جاتادى. اتالعان كەشەن ارقىلى قازاقستاننىڭ عارىش تەحنيكاسىن جاساۋ جونىندەگى جەتەكشى الەمدىك كومپانيالاردىڭ وندىرىستىك تىزبەگىنە قوسىلۋ مۇمكىندىگى بار.
قۇراستىرۋ - سىناۋ كەشەنىندە كومپونەنتتەر مەن عارىش اپپاراتتارىنىڭ وزدەرى سىنالاتىن ەرەكشە ستەندتەردى، كامەرالاردى، ستاپەلدەردى كورۋگە بولادى. ايتا كەتەرلىك جايت، اتالعان كەشەن ايگىلى ەۋروپالىق Airbus كومپانياسىمەن ىنتىماقتاسا وتىرىپ قۇرىلعان جانە ونىڭ جۇكتەمەسى دە Airbus كومپانياسىنىڭ تاپسىرىستارىمەن بايلانىستى بولادى.
عارىشتىق تەحنيكانىڭ ەرەكشەلىگى – ونىڭ كولەمى از بولعانمەن ونى سىناقتان وتكىزىپ، جۇمىس ىستەيتىن جاعدايعا جەتكىزۋ ءۇشىن قىرۋار جۇمىس پەن مول ۋاقىت جۇمسالادى. سوندىقتان دا كەز كەلگەن ەلدىڭ عارىش سالاسىنىڭ نەگىزى، ءوزىنىڭ ۇلتتىق سىناق جانە ستەندتىك بازاسىنىڭ بولۋىندا.
ەركە جومارت،
«ادىرنا» ۇلتتىق پورتالى
