Elımızde şai önımderınen qauıptı qospalar anyqtaldy. Osyǧan bailanysty qara şaidyŋ bırqatar markasyn äkeluge jäne satuǧa tyiym salyndy. Būl turaly DSM Sanitarlyq-epidemiologiialyq baqylau komitetı jazdy, dep habarlaidy «Adyrna» tılşısı.
Tiıstı qaulyǧa 5 qaŋtarda bas memlekettık sanitariialyq därıger qol qoiǧan. Şeşım baqylau satyp alulary men sanitariialyq-epidemiologiialyq saraptama qorytyndylarynyŋ negızınde qabyldanǧan. Tekseru barysynda qoldanystaǧy normativterge säikes paidalanuǧa tyiym salynǧan taǧamdyq boiaǧyştary bar qara şaidy öndıru jäne satu faktılerı anyqtalǧan.
«Saraptama jürgızu barysynda qūramynda taǧamdyq boiaǧyştar (sary «kün batuy» (E110), tartrazin (E102), ponso 4R (E124)) bar qara şaidyŋ öndırılıp, satylu faktılerı anyqtaldy, olardy şaida qoldanuǧa rūqsat etılmeidı»,-delıngen habarlamada.
Būdan bölek, halyqtyŋ sanitariialyq-epidemiologiialyq qauıpsızdıgı salasyndaǧy tergeuler barysynda şai qaptamalarynda şai öndırısı men qaptaluynda rastalmaǧan mekenjailardyŋ körsetılgenı anyqtalǧan, būl qyzmettı jüzege asyruǧa rūqsat beru qūjattarynyŋ joqtyǧyn körsetedı.
Anyqtalǧan zaŋbūzuşylyqtarǧa bailanysty kelesı qara şailardy elge äkeluge jäne satuǧa tyiym salyndy:
- “Apamnyŋ şäiı Premium Gold”, Al-Hayat Golg, “Balqiia Premium Gold” – öndıruşı: JŞS Orda Trade Astana (Almaty oblysy);
- Sultan Suleyman, Pakistan tea – öndıruşı: JŞS Real Trade Astana (Astana);
- “Balqiia Premium Gold” – öndıruşı: JŞS “Al-Hadiia” (Almaty);
- Aje Onim – öndıruşı: JK “Orda Chai” (Almaty) TOO “Kalsii” tapsyrysy boiynşa;
- Al-Hayat Golg – öndıruşı: Empire KENIY E.P.Z. Limited (Almaty oblysy);
- Al-Jannat Premium – öndıruşı: JK Ferdaus (Almaty);
- Alfarah – oramasynda öndıruşı körsetılmegen.
Sanitariialyq qyzmetter qazaqstandyqtardy önımnıŋ markirovkasyna jäne qaidan şyǧarylǧany turaly aqparatqa nazar audaruǧa şaqyrady.
