Auyl şaruaşylyǧy ministrlıgı ırı qara mal etın şyǧaruǧa qatysty jaŋa şekteulerdı qoldanu tärtıbın tüsındırdı.
2025 jylǧy 31 jeltoqsannan bastap IQM etın Qazaqstan aumaǧynan üşınşı elderge jäne EAEO memleketterıne äketuge arnalǧan kvotalardy bölu qaǧidalary qoldanysqa engızıldı. Būl norma 2026 jylǧy 30 mausymǧa deiın qoldanylady. Irı qara mal etın eksporttauǧa arnalǧan kvotanyŋ jalpy kölemı 20 000 tonna deŋgeiınde belgılendı.
Kvota menşıktı bordaqylau alaŋyndaǧy mal basyn paidalanatyn et öŋdeuşı käsıporyndardyŋ ırı qara mal etıne bölınedı.
Bır tūlǧaǧa berıletın kvota mölşerı bordaqylau alaŋynyŋ quatyna bailanysty. Atap aitqanda:
bordaqylau alaŋynyŋ quaty 5 000 bastan joǧary bolǧanda — 1 000 tonna;
10 000 bastan joǧary — 2 000 tonna;
15 000 bastan joǧary — 3 000 tonna;
20 000 bastan joǧary — 4 000 tonna;
50 000 bastan joǧary — 10 000 tonnaǧa deiın et eksporttauǧa rūqsat etıledı.
Būl tolyq sikldı öndıruşılerdı qoldauǧa jäne syrtqy sauda operasiialarynyŋ aşyqtyǧyn arttyruǧa baǧyttalǧan.
Atalǧan şaralar, eŋ aldymen, ışkı naryq müddelerı men mal şaruaşylyǧyn damytudyŋ strategiialyq mındetterınen tuyndap otyr. Uaqytşa şekteulerdıŋ negızgı maqsaty — azyq-tülık qauıpsızdıgın qamtamasyz etu, önımdı tereŋ öŋdeudı yntalandyru, statistikanyŋ aiqyndyǧyn qalyptastyru jäne ettıŋ şyǧu tegın qadaǧalau.
Şekteulerdı engızuge jekelegen kompaniialar men şaǧyn soiu sehtarynyŋ maldy bordaqylausyz qaita satyp, menşıktı öndırıstık bazany damytpastan jūmys jürgızu täjıribesı sebep boldy. Mūndai shema alypsatarlyq deldaldyqqa jol aşyp, sūranys pen ūsynystyŋ naqty teŋgerımın būrmalap, ışkı baǧalardyŋ ösu faktorlarynyŋ bırıne ainaldy.
Sondyqtan kvotalau tetıgı mal ösırumen jäne ony bordaqylaumen ainalyspaityn eksporttyq deldaldardy joiuǧa ärı öndırıstık infraqūrylymǧa investisiia salatyn, tehnologiia engızıp, jūmys oryndaryn qūratyn naqty öndıruşılerdı qoldauǧa baǧdarlanǧan.
Syrtqy sauda qyzmetıne qatysuşylar arasynda sandyq şekteulerdı bölu, kvotanyŋ kölemı men qoldanylu merzımderın aiqyndau ortalyq memlekettık organdarmen öz qūzyretı şegınde, uäkılettı organmen kelısu arqyly jüzege asyrylady. Būl ışkı naryqtaǧy ahualǧa ikemdı jauap beruge jäne ışkı tūtynudyŋ basymdyǧyn qamtamasyz etuge mümkındık beredı.
Jalpy alǧanda, būiryq qazaqstandyq mal şaruaşylyǧyn ūzaq merzımdı damytuǧa jäne tūraqty ışkı naryqty qalyptastyruǧa baǧyttalǧan. Būl otandyq fermerler men et öŋdeuşılerdıŋ pozisiiasyn nyǧaityp, tūtynuşylar üşın sapaly siyr etınıŋ qoljetımdılıgın arttyruy tiıs.
