Búgin, 18.11.2020 jyly Facebook-tegi «MEN-MAŃǴYSTAÝLYQPYN!» tobynda keń dalada qaraquıryqtardy aıaýsyz, qýalap júrip atqan brokonerlerdiń beınejazbasy kópshiliktiń shamyna tıgen bolatyn.
Beınejazbany topqa júktegen azamat Samat TALǴATOV: «Arabtar Mańǵystaýga kelip qaraquıryqtardy qyryp jatyr, Qazaqstannyń qyzyl kitabyna eńgen ańdardy osylar qurtady. Bizdiń sorly qazaqtar bulardy áýejaıdan orkestrmen kútip alady. Al olar sokol sııaqty qustardy aýlaıdy. Bozjyraǵa kelgen týrısterdiń oıy jaı demalý emes dala ańdaryn qustaryn qurtý»,- degen túsinik bere ketken.
Jeli qoldanýshylarynyń arasynda bul áreketke ashynǵandar: «Bul ne masqara! Ózgeniń basynǵany qashan tyıylady?», Aıtarǵa sóz joq kez kelgen ıt basyndy, obaly osylarǵa», «...kelimsekter kergip atatyn boldy-aý ańymyzdy» degen sekildi pikirlerin aıtyp, ózgelerdiń basynýyna jol bermeý kerektigin aıtqan-dy.
Tengrinews.kz-tiń málimetinshe, bul beınejazba Qazaqstanda túsirilmegen. Beınejazbaǵa baılanysty Ekologııa, geologııa jáne tabıǵı resýrstar mınıstrligi Qazaqstan aýmaǵynda mundaı jaǵdaıdyń tirkelmegenin jáne qaraquıryqtardyń bul túri bizdiń elimizde joqtyǵy týraly málimdeme bergen.
Beıne ınternette 2020 jyldyń qańtar aıynda Saýd Arabııasynda taraǵan. Beınejazbadaǵy kóriniske el ábden shamdanyp, sol sebepti jan-jaqty tekserý bastalǵan.
TheNewArab saıtynyń habarlaýynsha, beınejazbadaǵy janýar Arabııa túbeginiń shóldi aımaqtarynda kezdesetin semser múıizdi bóken bolýy múmkin (arabian oryx).
«Adyrna» ulttyq portaly
