بۇگىن، 18.11.2020 جىلى Facebook-تەگى «مەن-ماڭعىستاۋلىقپىن!» توبىندا كەڭ دالادا قاراقۇيرىقتاردى اياۋسىز، قۋالاپ ءجۇرىپ اتقان بروكونەرلەردىڭ بەينەجازباسى كوپشىلىكتىڭ شامىنا تيگەن بولاتىن.
بەينەجازبانى توپقا جۇكتەگەن ازامات سامات تالعاتوۆ: «ارابتار ماڭعىستاۋگا كەلىپ قاراقۇيرىقتاردى قىرىپ جاتىر، قازاقستاننىڭ قىزىل كىتابىنا ەڭگەن اڭداردى وسىلار قۇرتادى. ءبىزدىڭ سورلى قازاقتار بۇلاردى اۋەجايدان وركەسترمەن كۇتىپ الادى. ال ولار سوكول سياقتى قۇستاردى اۋلايدى. بوزجىراعا كەلگەن تۋريستەردىڭ ويى جاي دەمالۋ ەمەس دالا اڭدارىن قۇستارىن قۇرتۋ»،- دەگەن تۇسىنىك بەرە كەتكەن.
جەلى قولدانۋشىلارىنىڭ اراسىندا بۇل ارەكەتكە اشىنعاندار: «بۇل نە ماسقارا! وزگەنىڭ باسىنعانى قاشان تىيىلادى؟»، ايتارعا ءسوز جوق كەز كەلگەن يت باسىندى، وبالى وسىلارعا»، «...كەلىمسەكتەر كەرگىپ اتاتىن بولدى-اۋ اڭىمىزدى» دەگەن سەكىلدى پىكىرلەرىن ايتىپ، وزگەلەردىڭ باسىنۋىنا جول بەرمەۋ كەرەكتىگىن ايتقان-دى.
Tengrinews.kz-ءتىڭ مالىمەتىنشە, بۇل بەينەجازبا قازاقستاندا تۇسىرىلمەگەن. بەينەجازباعا بايلانىستى ەكولوگيا، گەولوگيا جانە تابيعي رەسۋرستار مينيسترلىگى قازاقستان اۋماعىندا مۇنداي جاعدايدىڭ تىركەلمەگەنىن جانە قاراقۇيرىقتاردىڭ بۇل ءتۇرى ءبىزدىڭ ەلىمىزدە جوقتىعى تۋرالى مالىمدەمە بەرگەن.
بەينە ينتەرنەتتە 2020 جىلدىڭ قاڭتار ايىندا ساۋد ارابياسىندا تاراعان. بەينەجازباداعى كورىنىسكە ەل ابدەن شامدانىپ، سول سەبەپتى جان-جاقتى تەكسەرۋ باستالعان.
TheNewArab سايتىنىڭ حابارلاۋىنشا، بەينەجازباداعى جانۋار ارابيا تۇبەگىنىڭ ءشولدى ايماقتارىندا كەزدەسەتىن سەمسەر ءمۇيىزدى بوكەن بولۋى مۇمكىن (arabian oryx).
«ادىرنا» ۇلتتىق پورتالى
