Elımızde memlekettık qyzmetkerlerdıŋ äleumettık kepıldıkterı qaita qaralady. Būl turaly bügın, 18 nauryzda Mäjılıstıŋ baspasöz qyzmetı jazdy, dep habarlaidy «Adyrna» tılşısı.
Jaŋartylǧan zaŋ jobasynda memlekettık qyzmettıŋ tartymdylyǧyn arttyru, bılıktı kadrlardy tartu jäne ūstap qalu üşın bırqatar normalar qarastyrylǧan. Atap aitqanda, jalaqyny kemınde üş jylda bır ret indeksteu tetıgı engızıledı, üsteme jūmys, demalys jäne mereke künderı üşın ötemaqy töleu közdeledı. Qyzmet ötılı 25 jyldan asqan jäne memlekettık nemese vedomstvolyq nagradalary bar qyzmetşıler zeinetke şyqqanda tört lauazymdyq jalaqy mölşerınde bırjolǧy syiaqy berıledı.
«Bır eldı mekennen ekınşısıne auysqanda nemese memlekettık organ köşırılgen jaǧdaida qyzmetşılerge köterme järdemaqy jäne mülkın tasymaldauǧa ötemaqy tölenbek. Balalary balabaqşaǧa kezeksız qabyldanady. Sonymen qatar jeŋıldetılgen tūrǧyn üi baǧdarlamalaryna qatysu mümkındıgı qarastyrylady»,-delıngen habarlamada.
