İran Iran International telearnasymen yntymaqtastyqty jalǧastyratyn elder men ūiymdardy äskeri nysanalar tızımıne engızuı mümkın ekenın mälımdedı, dep habarlaidy “Adyrna” ūlttyq portaly.
Iran International — täuelsız sputniktık arna.
Arnanyŋ mälımetınşe, tiıstı eskertu İrannyŋ memlekettık aqparat qūraldarynda jariialanǧan. Onda qaruly küşterdıŋ «Hatam äl-Anbiia» qolbasşylyǧynyŋ ökılı Iran International-dy «jalǧan aqparat taratyp, psihologiialyq soǧys jürgızıp otyr» dep aiyptaǧan.
«Eger būl BAQ-qa qoldau körsetu jalǧassa, onymen yntymaqtasatyn taraptar İran İslam Respublikasynyŋ nysanalar tızımıne engızıledı», — delıngen mälımdemede.
Iran International Ūlybritaniia aumaǧynan habar taratady jäne Türkımenstanǧa tiesılı TürkmenÄlem 52E/MonacoSat sputnigın paidalanady. Būl sputnik arqyly basqa da ondaǧan tele jäne radiokanaldar efirge şyǧady.
Telearna habarlauynşa, būǧan deiın Türkımenstan men Monakoǧa tıkelei eskertuler jasalǧan. Atalǧan elderdıŋ aumaǧynda habar taratu infraqūrylymy ornalasqan.
Sonymen qatar Tegeran Rumyniiaǧa da eskertu jasap, eger el öz aumaǧyndaǧy bazalardy AQŞ-tyŋ İranǧa qarsy operasiialary üşın paidalanuǧa rūqsat berse, qaqtyǧysqa qatysuşy tarap retınde qarastyrylatynyn jetkızgen.
Aita keteiık, 11 nauryzda Rumyniia parlamentı el aumaǧyna qosymşa amerikalyq äskeri bölımder men aviasiia ornalastyru turaly ūsynysty maqūldaǧan.
