Búgin aqparattyq-kommýnıkaııalyq ortalyǵynda Shymkent qalalyq Ishki saıasat jáne jastar isteri jónindegi basqarmasynyń basshysy Janar Bektaeva jáne «Erkin oı» gazetiniń bas redaktory Baltabek Túıetaevtyń qatysýymen «Intellectualdy ult» jalpyulttyq jobasy boıynsha brıfıng ótti.
Baspasóz májilisinde Janar Álibekqyzy, eń aldymen, «Intellectualdy ult» jalpyulttyq jobasynyń maqsaty jaıynda jan-jaqty jetkizdi.
– Bul jobanyń maqsaty jastardy zııatkerlik sport túrine baýlýǵa baǵyttalǵan. Iaǵnı, shahmat, toǵyzqumalaq jáne doıby oıyndary arqyly jastardyń oılaý qabiletin arttyryp, sanaly urpaq qalyptastyrý. Ǵylymda: «Adam oılaý júıesiniń 30-aq paıyzyn qoldanady. Al qalǵany jumys istetý arqyly damıdy» degen qaǵıda bar. Sol sebepti jas býynnyń durys oılaýyn damytýymyz kerek. Máselen, búginde jasóspirim jeńil oıyndarǵa, jeńiske jetýge qumar. Al shahmat oıynynyń basty qaǵıdasy – jeńis emes, sol jeńiske qalaı jetý. Iaǵnı, ár túrli ádis qoldanyp, strategııalyq qabiletin shyńdaıdy. Jastardyń boıyna jetpeı jatqan osy bir qasıetti jetildirý maqsatynda bul jobany qolǵa aldyq, – dedi basqarma basshysy.
Brıfıng barysynda atalǵan jobanyń janashyry ári júzege asyrýshysy Baltabek Túıetaev baıqaý jaıynda sóz qozǵady.
– Bul joba aıasynda «Oıly bolsań, ozyp kór!» baıqaýy ótedi. Ol 15 qazan kúni bastalyp, jyl sońyna deıin jalǵasady. Jalpy júlde qory – 2,5 mln teńge. Saıys jas erekshelikterge bólingen. Olar – oqýshylar, eresekter jáne ardagerler. Bul ıntellektýaldy oıyndar aqyl-oı tárbıesine, jeke adamdy qalyptastyrýǵa erekshe yqpal etedi. Atap aıtsam, qazaq topyraǵyndaǵy uly tulǵalar A.Qunanbaev, Sh.Qudaıberdiuly, M.Dýlatuly, Sh.Qaldaıaqov jáne Ǵ.Músirepov zııatkerlik ónerimen daralanǵan, – dedi Baltabek Isaquly.
Aıta keteıik, baıqaýda kásibı mamandar tóreshilik etedi.
Shymkent qalasynyń Aqparattyq-kommýnıkaııalyq ortalyǵy
Foto – S.Qosaı
