Qazaqstandyq belgili zańger Djohar Ótebaev sýdıalardyń ajyrasý úshin tólenetin baj salyǵyn kóbeıtý týraly usynysyna óz qarsylyǵyn bildirdi. Ol bul týraly Facebook jelisindegi resmı paraqshasynda jazdy, dep habarlaıdy «Adyrna» ulttyq portaly.
«Sýdıalar ózderiniń jaǵdaıyn jaqsartý úshin salyqty kóterýdi kimnen bastaýdy usyndy? Bankter men olıgarhtardan ba? Árıne, joq! Bizden, sonyń ishinde qarapaıym ajyrasqysy kelgen adamdardan.
Almaty qalalyq sotynyń sýdıasy Káribjanov sýdıalardyń VIII sezine aıǵaqtarmen kirip, basqa elderde ajyrasý úshin tólenetin baj salyǵynyń Qazaqstanǵa qaraǵanda joǵary ekenin jetkizdi. Ol Toqaevqa mysal retinde eki demokratııalyq derjavadaǵy jaǵdaıdy kórsetti. Iaǵnı, salyq Ózbekstanda 25 ese, Moldovada 120 ese kóp eken.
Árıne, bul ótirik! Moldovada baj salyǵy 40 leıdi quraıdy, ıaǵnı 1000 teńge.Men bul málimettiń jalǵan ekenin sezip, birden ǵalamtor betterin aqtardym. Al sýdıalardyń búkil sezi málimdeme barysynda eshqandaı burmalaýshylyqty anyqtaǵan joq! Qurmetti sýdıalar, sizderdiń erýdıııalaryńyz ben akademııalyq mádenıetterińiz qaıda?
Bizdiń moldovandyqtardan úırenerimiz kóp. Olar ózara kelisim bolǵan jaǵdaıda ǵana AHAJ bóliminde, sondaı-aq notarıýs arqyly ajyrasady. Al Qazaqstanda ortaq balalary bar erli-zaıyptylar ajyrasý úshin mindetti túrde sotqa júginýleri tıis.
Moldovanyń osy zańyn negizge ala otyryp, adamdardyń ómirin jeńildetýge bolar edi ǵoı? Biraq joq, sizderge halyqtyń qaltasyn qaǵyp qalý áldeqaıda qyzyǵyraq»,-dedi zańger.
«Adyrna» ulttyq portaly
