22 qazan kúni Almaty Memlekettik qýyrshaq teatry sazger Shámshi Qaldaıaqovtyń 90 jyldyq mereıtoıyna oraı "Ómir – Ózen" atty mýzykalyq teatrlandyrylǵan qoıylymyn qoıdy. Soǵan oraı «Adyrna» aqparattyq agenttiginiń tilshisi qoıylymnyń rejısseri Erkebulan Qabdyldan suhbat alǵan edi. Súbeli suhbatty nazarlaryńyzǵa usynamyz.
Jańa maýsymdy nelikten Shámshiniń shaǵyn qoıylymynan bastadyńyzdar?
Bıyl – Shámshiniń 90 jyldyǵy. Soǵan oraı kishigirim premera jasadyq. Bunyń aldynda onlaın premera jasalǵan bolatyn. Karantın báseńdetilgen soń kórermenderimizge Shámshiniń qoıylymynyń oflaın premerasyn kórermenderge usynyp otyrmyz.
Spektakl jaıynda qysqasha óz oıyńyzdy aıtyp ótseńiz?
Rejısser retinde Shámshi Qaldaıaqovty qoıar aldynda uzaq oılandym. Qazirgi kórermenderdiń talaby men talǵamy bárimizge belgili. Ándi oryndaýda eshqandaı fonogramma qoldanbaı, akterlar jandy daýysta oryndap shyqty. Akterdiń energetıkasy arqyly ándi kórermenge jetkizýge tyrystyq. Eń basty maqsatymyz – Shámshi ánderin óskeleń urpaqqa nasıhattap, ulttyq qundylyqtardy dáripteý. Tól ónerine baýlyp ósken bala keleshekte óz eli men jerine degen mahabbaty mol bolady.
Qoıylym basyna kaska kıgen qurylysshylarmen bastalady. Onyń ıdeıalyq máni qandaı?
Shámshiniń ánderi ár qazaqtyń júrek túkpirinde oryn alady. Sol sebepti qoıylym eń aldymen kórermenderge Shámshi ánin oryndatý arqyly bastalady. Mundaǵy basty maqsat - biz qarapaıym qurylysshy bolsaq ta, bıshi bolsaq ta, biz mahabbatqa mastansaq ta, biz toıda júrsek te, qaıda bosaq ta qazaq bar jerde Shámshiniń áni bar ekenin kórsetkimiz keldi.
Qýyrshaq teatrynyń aldaǵy josparlary qandaı?
Alǵa qoıǵan maqsattyń biri – teatrda qazaqı qoıylymdar qoıý. Tek qana qazaq emes, ejelden kele jatqan túrkilerge ortaq ertegilerdi de sahnalap, jas kórermenderimizdiń nazaryna usynsaq deımiz.
Aqgúl AIDARBEKOVA,
«Adyrna» ulttyq portaly
