Almaty qalasynyń Memlekettik qýyrshaq teatrynda Nıkolaı Gogoldiń áıgili «Shınel» povesiniń jelisimen «Shekpen» qoıylymynyńtusaýkeseri ótti. Atalmysh is-shara kórermenderdi de, teatr synshylaryn da beıjaı qaldyrmady.
«Shekpen» qoıylymy qýyrshaq teatry shyǵarmashylyǵyna jańa serpilis berip, teatr repertýarynda ózindik erekshe ornynqalyptastyrdy. Grýzııa elinen arnaıy shaqyrylǵan bilikti ári belgili rejısser Nıkoloz Sabashvılıdiń jetekshiligimen sahnalanǵan bul týyndy ózindik ózgeshe atmosferasymen, stılimen, tereń fılosofııalyq oılarymen kórermenderdi tańdandyrdy.
Qýyrshaq teatrynyń artısteri de spektakl barysynda aıanbaı eńbektenip, qýyrshaqtardy jáne zattardy oryndy oınatyp, komandalyq rýhty sezdiretin úılesimdi ansambl kórsete bildi. Basty róldi oryndaǵan daryndy artıst Shohan Qulnazarov basty keıipkerdiń beınesin jan-jaqty ári aıqyn ashyp, zor qoshemetke ıe boldy.
Nıkoloz Sabashvılı atalmysh qoıylymnyń paıda bolýy týrasynda kelesideı oılaryn aıtyp ótti: «Bunyń bári shyǵarmashylyq pikirl almasý men jańa ıdeıalardy talqylaý nátıjesinde qalyptasqan dostyqtan bastaldy dep aıta alamyn. Men bul qalada birinshi ret emespin, ásem Almaty qalasyna bul meniń úshinshi ret sapar shegýim. Ótken jyly men Halyqaralyq «Orteke»qýyrshaq teatry festıvali kezinde Almaty Memlekettik qýyrshaq teatry dırektorymen tanysqan bolatynmyn. Sodan keıin biz birlesken jobalardy júzege asyrý múmkindigin talqylap, artynan Grýzııa Qýyrshaq teatrlary birlestigi men Memlekettik qýyrshaq teatry arasyndaǵy ózara yntymaqtastyq memorandýmyna qol qoıdyq. Mine, sodan beri bir jyl óte men taǵy da Almaty qalasynda turmyn. Qýyrshaq teatrynyń ujymy meni óte jyly qabyldady, al ózińizdi jaıly sezingen jerde jumys isteý de ońaıyraq jáne qyzyqty bolady. Men osy teatrda spektakl qoıýǵa keliskenimdi durys sheshim dep esepteımin...».
«Shınel» – bul tek kóterińki kóńil kúı syılaıtyn qoıylym emes, sonymen qatar, bul eń talapshyl kórermenderdi de qanaǵattandyra alatyn ıntellektýaldy týyndy.
