ءشامشى قالداياقوۆتىڭ 90 جىلدىعىنا وراي قۋىرشاق تەاترى ارنايى قويىلىم ۇسىندى

422

 

22 قازان كۇنى الماتى مەملەكەتتىك قۋىرشاق تەاترى سازگەر ءشامشى قالداياقوۆتىڭ 90 جىلدىق مەرەيتويىنا وراي ء"ومىر – وزەن" اتتى مۋزىكالىق تەاترلاندىرىلعان قويىلىمىن قويدى. سوعان وراي «ادىرنا» اقپاراتتىق اگەنتتىگىنىڭ ءتىلشىسى قويىلىمنىڭ رەجيسسەرى ەركەبۇلان قابدىلدان سۇحبات العان ەدى. سۇبەلى سۇحباتتى نازارلارىڭىزعا ۇسىنامىز.

 

جاڭا ماۋسىمدى نەلىكتەن ءشامشىنىڭ شاعىن قويىلىمىنان باستادىڭىزدار؟

 

بيىل – ءشامشىنىڭ 90 جىلدىعى. سوعان وراي كىشىگىرىم پرەمەرا جاسادىق. بۇنىڭ الدىندا ونلاين پرەمەرا جاسالعان بولاتىن. كارانتين باسەڭدەتىلگەن سوڭ كورەرمەندەرىمىزگە ءشامشىنىڭ قويىلىمىنىڭ وفلاين پرەمەراسىن كورەرمەندەرگە ۇسىنىپ وتىرمىز.

 

سپەكتاكل جايىندا قىسقاشا ءوز ويىڭىزدى ايتىپ وتسەڭىز؟

 

رەجيسسەر رەتىندە ءشامشى قالداياقوۆتى قويار الدىندا ۇزاق ويلاندىم. قازىرگى كورەرمەندەردىڭ تالابى مەن تالعامى بارىمىزگە بەلگىلى. ءاندى ورىنداۋدا ەشقانداي فونوگرامما قولدانباي، اكتەرلار جاندى داۋىستا ورىنداپ شىقتى. اكتەردىڭ  ەنەرگەتيكاسى ارقىلى ءاندى كورەرمەنگە جەتكىزۋگە تىرىستىق. ەڭ باستى ماقساتىمىز –  شامشى اندەرىن وسكەلەڭ ۇرپاققا ناسيحاتتاپ، ۇلتتىق قۇندىلىقتاردى دارىپتەۋ. ءتول ونەرىنە باۋلىپ وسكەن بالا كەلەشەكتە ءوز ەلى مەن جەرىنە دەگەن ماحابباتى مول بولادى.

 

قويىلىم باسىنا كاسكا كيگەن قۇرىلىسشىلارمەن باستالادى. ونىڭ يدەيالىق ءمانى قانداي؟

 

ءشامشىنىڭ اندەرى ءار قازاقتىڭ جۇرەك تۇكپىرىندە ورىن الادى. سول سەبەپتى قويىلىم ەڭ الدىمەن كورەرمەندەرگە ءشامشى ءانىن ورىنداتۋ ارقىلى باستالادى. مۇنداعى باستى ماقسات - ءبىز قاراپايىم قۇرىلىسشى بولساق تا، ءبيشى بولساق تا، ءبىز ماحابباتقا ماستانساق تا، ءبىز تويدا جۇرسەك تە، قايدا بوساق تا قازاق بار جەردە ءشامشىنىڭ ءانى بار ەكەنىن كورسەتكىمىز كەلدى.

 

قۋىرشاق تەاترىنىڭ الداعى جوسپارلارى قانداي؟

 

العا قويعان ماقساتتىڭ ءبىرى – تەاتردا قازاقي قويىلىمدار قويۋ. تەك قانا قازاق ەمەس، ەجەلدەن كەلە جاتقان تۇركىلەرگە ورتاق ەرتەگىلەردى دە ساحنالاپ، جاس  كورەرمەندەرىمىزدىڭ نازارىنا ۇسىنساق دەيمىز.

 

اقگۇل ايداربەكوۆا،
«ادىرنا» ۇلتتىق پورتالى

 

پىكىرلەر
رەداكتسيا تاڭداۋى