Qazaqstannyń barlyq óńirindegi 3000-ǵa jýyq muǵalim men balabaqsha tárbıeshisi ınklıýzıvti ortada oqytýǵa úsh aptalyq daıyndyq baǵdarlamasy boıynsha bilim alýdy bastady. Baǵdarlamany Nazarbaev Ýnıversıteti Joǵary bilim berý mektebiniń ınklıýzıvti bilim berý salasyndaǵy professor-sarapshylardyń halyqaralyq komandasy ázirlep, «Dara» qaıyrymdylyq qorymen birge «Shevron» kompanııasynyń qoldaýymen iske asyrýda.
«Bul aýqymdy joba árbir balaǵa, onyń ishinde múmkindikteri shekteýli balalarǵa da sapaly bilim alýǵa kepildik berý úshin qoǵamdaǵy ózgeristerdiń jolserigi bolatyn, ınklıýzıvti praktıkaǵa yntaly jáne qabiletti pedagogtardy daıarlaý arqyly ınklıýzıvti bilim júıesin damytýǵa úles qosady», – deıdi jobanyń jetekshisi, Nazarbaev Ýnıversıteti Joǵary bilim berý mektebiniń professory Sýloshnı Pater.
«Inklıýzıvti bilim berýdi qalyptastyrý» jobasy QR bilim berý jáne ǵylymdy damytýdyń 2020-2025 jyldarǵa arnalǵan memlekettik baǵdarlamasynyń maqsatyna sáıkes – barlyq mektepterdi ınklıýzıvti etý maqsatyna qol jetkizýge járdemdesetin bolady.
Nazarbaev Ýnıversıtetiniń Joǵary bilim berý mektebinde osy taqyryp boıynsha Qazaqstandaǵy úzdik sarapshylar komandasy jumys isteıdi. Inklıýzııany damytý baǵytynda istegen jumysymen tanymal «Dara» qorynyń mamandarymen birge olar ınklıýzıvti bilim berýge kóshý kezinde qoldaýdy, biliktilikti arttyrýdy jáne arnaıy daǵdylardy damytýdy qajet etetin pedagogtardy oqytý baǵdarlamasyn ázirledi.
Koronavırýs pandemııasyna baılanysty oqytý onlaın formatynda ótedi. Joba komandasy baǵdarlama nátıjelerin baǵalaý jáne biliktilikti arttyrýdan ótken pedagogtarǵa odan ári qoldaý kórsetý úshin oqýdy aıaqtaǵannan keıin offlaın kezdesýlerdi de josparlap otyr. Sondaı-aq, baǵdarlama barysynda mektep dırektorlaryna arnaıy trenıngteri ótedi. BǴM, Altynsarın atyndaǵy Bilim akademııasynyń jáne ýnıversıtetterdiń qatysýymen semınarlar uıymdastyrylady.
Qazaqstanda jalpy bilim berý mektepterde erekshe qajettilikteri men densaýlyq múmkindikteri shekteýli balalardyń sany ósýde. Alaıda, bul proess óte baıaý júrip jatyr, al júrgizilgen zertteýler kórsetkendeı, muǵalimder ınklıýzıvti bilim berýdiń sátti iske asyrylýyna sense de, olar kóbinese barlyq balalardy, ásirese aýyr múgedektigi bar balalardy qurdastarymen birge oqytýǵa qarsy turady. Sondyqtan muǵalimderdiń kózqarasy ınklıýzıvti bilim berýge kóshýdiń sheshýshi faktory bolyp sanalady.
"Adyrna" ulttyq portaly
