Bir kúni saıajaıdaǵy aıaldamaǵa «Baǵban kerek» degen habarlandyrý ildim. Qasymnan ótip bara jatqan qarııa kisi oqydy da, qabaǵyn túıip: «Ol nemenege kerek?» dep surady.
«Túk úlgermeı kettim, tórt bala, jumys bastan asady» - dep men aqtaldym.
Zeınetker apa ústimnen bir shelek keıisti laq etkizdi: «Úlgermeımin deıtinin qara! Biz aýylda 50 shelek sý tasyp, kartop egetinbiz. Sýdy qudyqtan tasıtynbyz. Tańǵy beste turyp sıyr saýatynbyz. Jeti toraıdyń tamaǵyn berip, taýyqtyń jemin shashatynbyz. Úıde sal bop jatqan enemizge qaraıtynbyz... Óńkeı aq saýsaq! Qutyryp ketipsińder ǵoı!»
Ómirdi elekten ótkizgen saıyn baıqaıtynym, bul fánıde eshqandaı obektıvtilik joq. Adam árdaıym sýbektıvti túrde synaıdy. Óziniń bıiginen mineıdi.
Biraq sodan biz jeńimpaz, ózgeler – súmelek bop qalmaıdy. Tek adamdar ár túrli ekenin túsinesiń.
Bireý jeti bala taýyp, tisi shyqqansha emizedi. 18 jyl úzdiksiz bala emizýmen ótedi. Ol sonysyn baq sanaıdy. Al taǵy bireýi bir bala tapsa, ómirdiń bar qyzyǵynan aıyrylǵandaı kúı keshedi. Segizinshi qabattan sekirip ketýge ázir.
Keı adam ala jazdaı shlang pen ketpenin qolynan tastamaıdy. 25 sotki jerden bir tal aramshóp tappaısyz. Al bireýge baý-baqsha degen ortaǵasyrǵa oralý sekildi.
Bir kórshimniń úıi – baqyttyń mekeni. Qonaq kóp keledi. Qashan barsań, dastarhany jaıýly. Nany pisip turady. Táttisi molynan. Taǵy bir kórshim bar – onyń úıinde tipti shaı da joq. Ash qalǵan soń mysyǵy da qashyp ketken. Esesine sársenbi kúni doktorlyq dıssertaııasyn qorǵamaq.
Marınanyń jeke massajısti, astrology, kosmetology, stılısti bar... Tamara ylǵı djınsymen júredi. Shashyn shultıtyp kesip tastaıdy. Oǵan solaı yńǵaıly.
Nına kúıeýinsiz túk bitire almaıdy. Al sińlisi bárin ózi isteıdi. Fýndamentti de ózi quıady. Shatyrdy da ózi jaýyp alady. Monshany da ózi saldy.
Bul áıelderdiń bári ózdiginshe durys ómir súrip jatyr.
Bir birimizdi túsinbesten ómir súrýge bolady. Túsinýge tıisti de emespiz. Femınıster eshqashan Olga Valıaevany túsinbeıdi. Tramvaı júrgizetin áıel – kabrıolet mingen hanshaıymdy túsinbesi anyq. Franýzdyq kondıter vokzaldaǵy bálish satqyshty túsinbeıdi. Chaıldfrı – kópbalaly anany túsinbeıdi.
Túsiný shart emes. Bastysy – salystyrmaý.
Árkimniń psıhotıpi ár túrli. Temperamenti, damý deńgeıi, ómirlik qundylyǵy, kúsh-qýat qory, jan tebirenisi, talǵamy, talanty, tárbıesi, mentalıteti bólek.
Qunsyzdandyrý – ózgeni kemsitý arqyly ózińniń menińdi tómen baǵalaý.
Bálkim, haıýanattardan bir-birine soqtyqpaı ómir súrýdi úırensek qaıtedi? Aıý qoıandy synamaıdy ǵoı. Apanda qystamaısyń, densaýlyǵyńdy qurtasyń demeıtini anyq. Ańdar ár túrli. Paralleldi álemde ómir súre beredi.
Adamdar da solaı. Bizdiń álemde de adamdar kóp. Olar ár túrli.
Úndemeı baqyla, tań qal, úlgi-ónege al, ıakı dym demesten ótip ket. Tek salystyrma. Ár qoıannyń óz quny bar. Meıli, ol aıý bolmasa da.
Ipına Dýbs
Aýdarǵan Shynar Ábilda
"Adyrna" ulttyq portaly
