Tehasta tuyp-ösken Marion Luna Brem 17 jasynda äskeri adamǧa küieuge şyǧady. Bır jyldan soŋ tūŋǧyş ūly, bes jyldan soŋ ekınşı ūly dünie esıgın aşty. Amerikalyq otbasy tatu-tättı ömır süredı.
1984 jyly Luna Brem 30 jasqa tolady. Ökınışke qarai, keiıpkerımızde ekı jaqty onkologiia anyqtalyp, ol bırneşe ota jasatady (Ginekologiialyq jäne anaryn alyp tastau boiynşa). Osydan keiın himioterapiia bastalady. Sonyŋ saldarynan Marion taz bop qalady. Därıgerler oǧan ekı-üş jyldyq ömırıŋ qaldy dep boljam aitady. Küieuı bar qiyndyqty köre tūryp, Mariondy tastap ketedı. Ūldarynyŋ ülkenı 12-de, kışısı 7-de bolady. Eşqaşan jūmys ıstemegen jas kelınşek jalǧyz qalady. Onyŋ üstıne otaǧa tölenetın bıraz qarjy moinyna qaryz bolyp ılınedı.
Üi tırlıgınen asyp eşteŋe ıstep körmegen äiel balalaryn qalai asyraimyn dep oilanady. Bır künı basy qatty auyryp, vannada ūstamasy ūstap qalady. Söitıp jatqanda asüiden ūldarynyŋ külgen dauysyn estidı. Sol sätte miynda bır närse qosylady. Qaitsem de dertımnen sauyǧamyn dep ornynan tūrady.
Marion kölık satudan jaqsy tabys tabuǧa bolatynyn jaqsy bıletın. Ol avtodillerlerge baryp öz qyzmetın ūsynady. Bıraq būl salada tek er adamdar ǧana jūmys ısteitının baiqaidy. Ol ekı apta ışınde 16 adamnan joq degen jauap alady. Strategiiasyn auystyrmasa ümıtı üzıletının sezgen ol 17-şı ret jūmys sūraudyŋ ornyna jūmys beruşıge: «Senıŋ kompaniiaŋ maǧan mūqtaj, menı alsaŋ, tabysqa kenelesıŋ» dep kesıp aitady. Ony jūmysqa alady.
Ol kölık satuşy äiel retınde erlerge qaraǧanda bırşama artyqşylyǧyn sezınedı. Kölık aluǧa kelgenderdıŋ jūbailaryna qandai kölık alu qajetın tüsındırıp otyrady. Al erkek satuşylar köbıne küieulerdı satyp aluǧa köndıruge tyrysatyn-dy.
Alǧaşqy eŋbek jyly Luna Brem jyl satuşysy degen ataqty alady. Oǧan erler taǧatyn Roleks saǧatyn qosyp beredı. Ony tek er adamdarǧa ǧana beredı eken. Sol sätte därıgerler onyŋ onkologiiasy remissiiaǧa tüskenın habarlaidy. Marion küş jinai bastaidy.
Odan keiıngı ekı jyl öte tabysty bolady. Ol özın bastyq etıp qoiudy ūsynady. Bıraq jūmys beruşı «sen kölık satudan ketseŋ, paida tüspei qalady» dep onyŋ ūsynysyn qabyldamai tastaidy.
Bıraq Marion jaŋa jūmys ızdeuge şyǧady. Ekı aptadan soŋ basqa bır avtodiller ony özı qalaǧan lauazymǧa jūmysqa alady. Sodan bastap onyŋ lauazymy kün ötken saiyn öse beredı.
Taǧy ekı jyl ötkende özı de avtodiller boluǧa qarjy jinaudy bastaidy. Bar-joǧy $800 000 jetpei tūrdy. Būl ol üşın tüske kıretın soma bolatyn. Marion taǧy da oilanady. Bıraq bılek sybana kırısedı. Biznes-jospar jazyp, oǧan özınıŋ ömırbaianyn qosyp, investor tauyp beretın 50 auditorlyq kompaniiaǧa taratady.
Ekı aptadan soŋ investor tabylady. Luna Brem özınıŋ avtosalonyn aşady. Chrysler kölıkterın satumen şūǧyldanady. Söitıp, 1989 jyly jürek taǧylǧan «Love Chrysler» saudaǧa şyǧady. «Būl jai jürek emes, būl bızdıŋ adamdardyŋ jüregı, bız Tehasqa mahabbatymyzdy arnaimyz» degen ūranmen öz ısın bastaidy.
Marionnyŋ talpynysy eselep qaitty. Bügınde onyŋ obyry jazyldy. Ekı avtosalony bar. Jyldyq ainalymy $45 mln. dollar. Kıtap jazudy ūnatady. Otyz jasynda kürdelı ota jasatuy, küieuı tastap ketuı bar, därıgerler öledı dep kün sanaǧan adam emdelıp, öz ısın bastap, milliondap tabys tapqany taŋqalarlyq jaǧdai ma? Ärine!
Ol ūldarynyŋ dauysyn estıp, öz ömırın qolǧa aldy. Arzan parik kiıp, erlerdıŋ älemıne qadam basty. Ūldaryna būryn-soŋdy bere almaǧan baqytty balalyq şaq syilady.
«Keide jai esık qaǧu azdyq etedı. Keide esıktı syndyryp kıru kerek» deidı Marion.
Audarǧan Şynar Äbılda
"Adyrna" ūlttyq portaly
Ūqsas jaŋalyqtar
