ءبىر كۇنى ساياجايداعى ايالداماعا «باعبان كەرەك» دەگەن حابارلاندىرۋ ءىلدىم. قاسىمنان ءوتىپ بارا جاتقان قاريا كىسى وقىدى دا، قاباعىن ءتۇيىپ: «ول نەمەنەگە كەرەك؟» دەپ سۇرادى.
«تۇك ۇلگەرمەي كەتتىم، ءتورت بالا، جۇمىس باستان اسادى» - دەپ مەن اقتالدىم.
زەينەتكەر اپا ۇستىمنەن ءبىر شەلەك كەيىستى لاق ەتكىزدى: «ۇلگەرمەيمىن دەيتىنىن قارا! ءبىز اۋىلدا 50 شەلەك سۋ تاسىپ، كارتوپ ەگەتىنبىز. سۋدى قۇدىقتان تاسيتىنبىز. تاڭعى بەستە تۇرىپ سيىر ساۋاتىنبىز. جەتى تورايدىڭ تاماعىن بەرىپ، تاۋىقتىڭ جەمىن شاشاتىنبىز. ۇيدە سال بوپ جاتقان ەنەمىزگە قارايتىنبىز... وڭكەي اق ساۋساق! قۇتىرىپ كەتىپسىڭدەر عوي!»
ءومىردى ەلەكتەن وتكىزگەن سايىن بايقايتىنىم، بۇل فانيدە ەشقانداي وبەكتيۆتىلىك جوق. ادام ءاردايىم سۋبەكتيۆتى تۇردە سىنايدى. ءوزىنىڭ بيىگىنەن مىنەيدى.
بىراق سودان ءبىز جەڭىمپاز، وزگەلەر – سۇمەلەك بوپ قالمايدى. تەك ادامدار ءار ءتۇرلى ەكەنىن تۇسىنەسىڭ.
بىرەۋ جەتى بالا تاۋىپ، ءتىسى شىققانشا ەمىزەدى. 18 جىل ۇزدىكسىز بالا ەمىزۋمەن وتەدى. ول سونىسىن باق سانايدى. ال تاعى بىرەۋى ءبىر بالا تاپسا، ءومىردىڭ بار قىزىعىنان ايىرىلعانداي كۇي كەشەدى. سەگىزىنشى قاباتتان سەكىرىپ كەتۋگە ءازىر.
كەي ادام الا جازداي شلانگ پەن كەتپەنىن قولىنان تاستامايدى. 25 سوتكى جەردەن ءبىر تال ءارامشوپ تاپپايسىز. ال بىرەۋگە باۋ-باقشا دەگەن ورتاعاسىرعا ورالۋ سەكىلدى.
ءبىر كورشىمنىڭ ءۇيى – باقىتتىڭ مەكەنى. قوناق كوپ كەلەدى. قاشان بارساڭ، داستارحانى جايۋلى. نانى ءپىسىپ تۇرادى. ءتاتتىسى مولىنان. تاعى ءبىر كورشىم بار – ونىڭ ۇيىندە ءتىپتى شاي دا جوق. اش قالعان سوڭ مىسىعى دا قاشىپ كەتكەن. ەسەسىنە سارسەنبى كۇنى دوكتورلىق ديسسەرتاتسياسىن قورعاماق.
مارينانىڭ جەكە ءماسساجيستى، استرولوگى، كوسمەتولوگى، ءستيليستى بار... تامارا ىلعي دجينسىمەن جۇرەدى. شاشىن شۇلتيتىپ كەسىپ تاستايدى. وعان سولاي ىڭعايلى.
نينا كۇيەۋىنسىز تۇك بىتىرە المايدى. ال ءسىڭلىسى ءبارىن ءوزى ىستەيدى. فۋندامەنتتى دە ءوزى قۇيادى. شاتىردى دا ءوزى جاۋىپ الادى. مونشانى دا ءوزى سالدى.
بۇل ايەلدەردىڭ ءبارى وزدىگىنشە دۇرىس ءومىر ءسۇرىپ جاتىر.
ءبىر ءبىرىمىزدى تۇسىنبەستەن ءومىر سۇرۋگە بولادى. تۇسىنۋگە ءتيىستى دە ەمەسپىز. فەمينيستەر ەشقاشان ولگا ۆالياەۆانى تۇسىنبەيدى. ترامۆاي جۇرگىزەتىن ايەل – كابريولەت مىنگەن حانشايىمدى تۇسىنبەسى انىق. فرانتسۋزدىق كونديتەر ۆوكزالداعى ءبالىش ساتقىشتى تۇسىنبەيدى. چايلدفري – كوپبالالى انانى تۇسىنبەيدى.
ءتۇسىنۋ شارت ەمەس. باستىسى – سالىستىرماۋ.
اركىمنىڭ ءپسيحوتيپى ءار ءتۇرلى. تەمپەرامەنتى، دامۋ دەڭگەيى، ومىرلىك قۇندىلىعى، كۇش-قۋات قورى، جان تەبىرەنىسى، تالعامى، تالانتى، تاربيەسى، مەنتاليتەتى بولەك.
قۇنسىزداندىرۋ – وزگەنى كەمسىتۋ ارقىلى ءوزىڭنىڭ مەنىڭدى تومەن باعالاۋ.
بالكىم، حايۋاناتتاردان ءبىر-بىرىنە سوقتىقپاي ءومىر ءسۇرۋدى ۇيرەنسەك قايتەدى؟ ايۋ قوياندى سىنامايدى عوي. اپاندا قىستامايسىڭ، دەنساۋلىعىڭدى قۇرتاسىڭ دەمەيتىنى انىق. اڭدار ءار ءتۇرلى. پاراللەلدى الەمدە ءومىر سۇرە بەرەدى.
ادامدار دا سولاي. ءبىزدىڭ الەمدە دە ادامدار كوپ. ولار ءار ءتۇرلى.
ۇندەمەي باقىلا، تاڭ قال، ۇلگى-ونەگە ال، ياكي دىم دەمەستەن ءوتىپ كەت. تەك سالىستىرما. ءار قوياننىڭ ءوز قۇنى بار. مەيلى، ول ايۋ بولماسا دا.
يpينا دۋبس
اۋدارعان شىنار ءابىلدا
"ادىرنا" ۇلتتىق پورتالى
