Azamatyń – aınań!

3007
Adyrna.kz Telegram

Eger belgili bir adamnyń sizdiń ómirińizdegi mańyzyn túsinseńiz, ony jaqsy kórip úırený jeńildeıdi. Ár adam meniń ustazym dep qabyldap, oǵan razylyq bildirý óte mańyzdy.

Sizdiń ómirge dál osyndaı er adamnyń kelýi teginnen tegin emes. Adamnyń tutas ómiri mektep. Ótetin basty dáris – mahabbat. Erkekter arqyly eń basty, keıde tipti eń kúrdeli sabaqty úırenemiz. Mamandyq bireý ǵana – mahabbat pen ózińdi taný. Óz boıymyzda mahabbat bar kezde ǵana ony bireýge arnaı alamyz. Ózimizde joqty ózgege qalaı bermekpiz? Sizdiń azamatyńyz – árdaıym sizdiń aınańyz! Ol sizdiń boıyńyzda, bolmysyńyzda bar dúnıeni kórsetedi. Jaqynda bir áıelden tek laıyq jigit úshin tyrysýǵa barmyn degen sózdi estidim. Osylaı deýge bola ma? Siz ózińizdi estip tursyz ba? Laıyq jigit degen kim?

Sizdiń ómirde bolǵan, sizge kóńilin bildirgen, áli bildiretin ár azamat siz úshin laıyqty! Laıyq jigit degen – tym qarabaıyr uǵym. Sebebi, ár erkektiń óziniń laıyqty minezi, abyroıy bar. Sizge tartylǵan baılyqqa laıyqsyz. Erik-jigeri tómen, «mamasynyń balalary» ǵana tartylyp tursa, bul jaqsy da, jaman da emes. Bul jaı ǵana fakt. Dál qazirgi tańda ómirińizge kimdi qabyldaýǵa daıyn ekenińizdi kórsetetin fakt. Sizdiń ómirge engen erkek sizdiń ishki túıtkilderińizdi kórsetýshi ǵana. Sondyqtan sol erkekke qarap ózińizdi jańadan tanýǵa, syrttaı baqylaýǵa alýyńyzǵa bolady. Buny jańa bilim dep qabyldańyz.

Keń taralǵan jaǵdaıattardy iriktep kóreıik:

Eger ómirińizge qyzǵanshaq bireý kelse, endeshe seksýaldy energııańyzdy shyǵarmashylyqqa bura bilińiz. Sebebi, óziniń seksýaldy energııasyn basqara alatyn áıeldiń ómirine qyzǵanshaq kúıeý, ıakı jigit eshqashan tartylmaıdy.

Judyryǵyn ala júgiretin erkek qandaı áıelge tartylady? Ómirińizge dókir erkek ense, ózińizdi tyńdap úırený qajet bolǵany. Ur da jyq minezdi erkektermen turatyn áıelderdiń deni shekara degenniń ne ekenin bilmeıtinder. Sondyqtan ózderin qurbandyqqa aınaldyra salady. Ózin ylǵı baqytsyz, jalǵyz, jurtta qalǵandaı sezingendi jaqsy kóredi. «Kúıeýim tajal, aýa raıy qolaısyz, basqalar qýanyp ómir súredi, al meni Qudaı jazalaǵan, taǵdyrym solaı bolsa kerek, ómirim óksikpen ótýde» degennen tanbaıtyndar. Osyǵan saı erkegi ol áıeldi ornyna qoıady, ne ózin qurmetteýdi úıretedi. Onyń tulǵalyq qasıetterin oıatady. Qurbandyq bolýdan shyǵyp, óziniń shekarasyn aıqyndaýdy, ózin qorǵaýdy úıretedi. Basqa erkek mundaı áıelge ózin tyńdaýdy úırete almaıdy. Qurbandyqqa aıaýsyz ay shapalaq jeý kerek, sonda ǵana ol ózin tyńdap úırenbek. Sonda ǵana ómirin ózgertýge baryn salady.

Eger kúıeýińiz ishkish, bir nársege táýeldi bolsa, ol da bekerden beker emes. Siz de ony bir nárse úshin tańdaǵansyz. Óte mańyzdy sabaqty túsiný úshin. Mundaı juptaǵy áıel ózin qalaı ustaıdy? Mundaı áıel únemi eriniń mıyn jeıdi, sol sózimen onyń menin, erkektigin óltiredi. Iakı, ózi «baıǵus» bolyp, elden erek baqytsyz adam keıpine túsip, jurttyń bári sonyń basynan sıpaýy tıis beınege enedi. Kúıeýi ishedi, aqsha joq, balalary sotqar. Bitpeıtin baqytsyz ómir. Onyń kúıeýi eń aldymen, mundaı áıelge «názik» bol degen belgi beredi eken. Óziniń áıeldik bolmysynan aýytqyp ketkenin kórsetedi. Áıelge mańyzdy bolar bir minezin jaýyp-jasqaǵany úshin osyndaı kúıeý beriledi. Ol kúıeý ishimdikke salynyp, shyn ómirden bezinedi. Ekinshi jaǵdaıda, mundaı kúıeý áıelge ózin jaqsy kórýdi, qurmetteýdi, eseıýdi, óz ómirine jaýapkershilik alýdy úıretedi eken.

Eger sizge «mamasynyń balasy» tartylsa, erik-jigeri joq, ózi bilip sheshim qabyldaı almaıtyn erkek kelse, onda siz bılikti erkektiń qolyna bere almaıtyn qaısar minezdi áıel bolǵanyńyz. Bárin ózińiz sheshesiz, bárin ózińiz bilesiz, bárin tek siz ózgertesiz. Mundaı adammen urys-keris ony ózgertkińiz kelgennen bastalatynyn baıqamaı qalasyz. Ony eshqashan tyńdamaısyz. Qazir de olaı emes dep aıtasyz.

Eger sizdiń ómirge ýáde bergish, biraq bir ýádesin oryndamaıtyn, saýyq-saırannan qoly bosamaıtyn, ádemi sóıleıtin, ádemi kıinetin, ońaı ómir súretin adam kelse, bar qaıǵyńyz «tezirek osy toı bitip, tezirek adam sııaqty ómir súrsek eken» bolsa, onyń jaýaby: eshqashan bitpeıdi, eshqashan adam sııaqty ómir súrmeısiz. Mundaı adam sizge: «Ózińdi baǵalaýdy úıren» deý úshin kelgen. «Nege meniń erejemniń yńǵaıyna jyǵylasyń? Nege meniń degenime kóne beresiń? Eki aıǵa joǵalyp kettim, al sen báribir maǵan esigińdi ashasyń. Meniń bos sózderime toıyp bolmadyń ba? Seni munda eshkim baǵalamaıdy. Eger qazir meniń degenime kónseń, erteń laıyq jigit kelip seni súıse de, sál ýaqyttan soń tez sýynady. Sebebi, ózin baǵalamaıtyn, árkimniń yǵyna jyǵyla beretin áıelden erkektiń bári bezinedi».

Qarym-qatynastyń mundaı senarııleri óte kóp. Men tek laıyqty jigit úshin tyrysamyn degenge qaıtyp oralmaqpyn. Áıel o bastan laıyqty bireý úshin emes, eń aldymen ózi úshin tyrysýy tıis. Kez kelgen qarym-qatynasta solaı bolǵany abzal. Eger qasyńyzda jigitińiz bar bolsa, ózińizden «men basqaǵa laıyqpyn ba?» dep surap kórińizshi. Aq tulpar mingen hanzada meniń qaı qylyǵyma ǵashyq bolýy kerek? Hanzada da bitpeıtin kompleks, neshe túrli manııa, kirpııazdyǵynan asa almaıtyn qyzǵa ǵashyq bolmaıtyny beseneden belgili. Munyń barlyǵyn tanyp, túzetý qajet. Adamdar kólik júrgizýdi Ferrarıden bastamaıdy ǵoı.

«Tulǵanyń kóleńkeli jaǵy» degen túsinik bar. Adam ózi tolyq sezinbese de, kórmese de, ol bolmysynda, túpsanasynda bar dúnıe. Kóleńkede qala beretin qasıetter. Iaǵnı, adamǵa áser etetin aınanyń tikeleı jáne keri qaıtymdy túrleri bolady.

Tikeleı aınasy: bireýdiń boıyndaǵy sizdiń qıtyǵyńyzǵa tıetin qasıeti. Ol sizdiń de boıyńyzda bar minez. Ózińizdiń boıyńyzdaǵyny baıqamaısyz. Mysaly: kúıeýińiz dıvanda túk bitirmeı jatyr. Solaı bos jatqanyn kórgende qabaǵyńyzdy túıesiz. Iaǵnı, jalqaýlyq sizdiń boıyńyzda da bar bolǵany. Siz de jalqaýsyz, dıvanda jata turǵandy jaqsy kóresiz. Biraq jata almaısyz. Sebebi, bala kúnnen jigerli bolýdy úıretti. Jaıdan jaı jatýǵa bolmaıdy dep sińirgen. Iakı, eshqashan bos jatýǵa qol tımeıdi. Ylǵı kúızeliste júresiz. Úı, jumys, bala, úı tazalaý, tamaq pisirý. Bul neni bildiredi? Jumystyń bárin tastap, kúıeýińizdiń janyna jata ket degen sóz emes. Ony durys qabyldap úırenińiz: «meniń de túpsanamda jalqaýlyq bar eken-aý, kúıeýimnen de ótip ketýim múmkin». Anda-sanda ózińizge arnap demalys jasap turyńyz. Jaı ǵana túk istemeı jata turý. Massajǵa barý. Unaıtyn isti jasaý. Jalqaýlyqqa jol berý.

Keri qaıtymdy aına: erkektiń boıyndaǵy qıtyqqa tıetin minezdi tabamyz. Osy belginiń keri minezi sizdiń boıyńyzda bar ma? Mysaly: erkek – osal, siz – myqty. Endeshe, myqtylyqty erkekke qaldyryp, názik bolýdy meńgerińiz. Erkek - jaýapsyz, siz - gıper jaýaptysyz. Bárin qadaǵalap, baqylap jaman úırengensiz. Erkekke senip úırenińiz. Júıkeni bosańsytý kerek. Erkek – ótirikshi, siz – aqıqatshylsyz. Únemi onyń sózine dálel izdep, kýá talap etesiz. Senim joq. Erkek – sarań, siz – jomartsyz. Erkek sarań bolsa, siz ózińizge tıyn jumsamaıtyndyqtyń belgisi. Ózińizge mahabbatty qımaıtyn jansyz. Jaqsy kóńil kúıdi qımaısyz. Jalpy, keri qaıtymdy aınanyń prınıpi túsinikti boldy ma?

Osynyń bárin boıyńyzdan ótkizip, túsingen kezde, birinshiden, bul qasıetterdi qabyldap úırenesiz. Ekinshiden, munyń bárinen bıikteısiz. Osy qasıetterdi moıyndaǵanda, qasymyzdaǵy erkekter ózgere bastaıdy. Olardyń minez-qulqynda ózgerister paıda bolady. Olardyń ár qylyǵy qıtyǵymyzǵa tımeıtin bolady. Negizi búkil álem aına prınıpi boıynsha damıdy. Kúlli qorshaǵan orta - bizdiń aınamyz. Ózge adamdar arqyly ózińizdiń ishińizde ne bar ekenin tanısyz. Qorshaǵan ortaǵa kóńilińiz tolmasa, jumys oıdaǵydaı bolmasa – eń aldymen ózińizge kóńilińiz tolmaǵany. Adamnyń ózine degen iltıpatynan ózgege degen qarym-qatynasy bastalady. Sol sekildi bizdi qorshaǵan adamdar bizdiń aınamyz bolady.

Ishimizde bar dúnıe syrtymyzda da kórinis beredi. Ishki álemimiz ózgelerdiń ishki álemimen úndesip, bizge tartady. Sondyqtan, aınalańyzdaǵy adamdardyń bári jabyrqaý bolsa, shetinen qaıǵy-muńda, kúızeliste júrse, sizdiń boıyńyzda da sol bar bolǵany. Aınalańyz jarqyn jandar, meıirim men mahabbat tunyp tursa, sizdiń júregińiz de jarqyrap turǵany. Ózińizdi ózgertińiz, sonda aınalańyzdaǵy adamdar da, álem de ózgere beredi.

Munyń barlyǵyn sizdi aıyptaý úshin emes, áıeldiń ózin qalaı ózgerte alatynyn bildirý úshin jazdyq. Áıel qalasa, qolynan bári keledi. Tipti opasyzdyq degenniń ózi de patologııa emes, alfons kezdesse, bul – tabý emes. Ony da ózgertip ala alasyz. Bul áıelge ózińe qara, ózińdi ózgert degen belgi ǵana.

Erlerdiń áıel zatyna kórsetetin sabaqtarynyń deni áıeldiń bolmys-bitimine baılanysty bolatynyn baıqadyńyz. Qazirgi zamanda áıelderdiń kóbisi qısyq aınaǵa aınalyp barady. Zııandy vırýstarmen ýlanǵandaı. Áıelder erlerdiń energııasyn sińirip alǵysh. «Temir Hanshaıymnyń» janynda kez kelgen erkek dıvanǵa jatqysh, moınyna mingish, áreketsizdikke urynyp, ishkishtikke salynyp, júrgish bop ketedi. Nemese áıel qurbandyq keıpine ense, erkek qol kótergish, dókir, opasyz qylyqtarǵa barǵysh bop alady. Shyn máninde erkektiń áreketi arqyly Ǵalam áıeldi túzetýge tyrysady. «Qaıtyp áıel bol. Ózińdi jaqsy kórip úıren. Ómirdi baǵala. Sen qaıǵyrý úshin ómir súrmeısiń. Sen –áıelsiń! Sýdyń aǵynyn sezetin, erkektiń bolmysyn bıiktetin áıel qaıda? Qumarlyqtyń oty qaıda? Oshaqtyń jylýy qaıda? Erkekke degen qurmet pen baǵyný qaıda? Erkekke degen senim qaıda? Bul erkek sen úshin trenajer, seniń áıeldik bolmysyńdy ashatyn sabaq. Úıren» degeni.

Biraq áıelder ony estimeıdi. Qarym-qatynasty úzedi. Basqa erkekti jolyqtyrady. Onymen de sol baıaǵy jyr. Keıde burynǵysynan da qıyn tıip jatady. Menińshe, ózgeristiń bári áıeldiń ózinen bastalýy tıis. Sebebi, áıel – keńistik. Erkekke jaýapkershilikti ilmes buryn, ózińizge qarańyz. Ol sizdiń aınańyz. Árıne, ınternette erkekti basqaryp, odan kóp syılyq alýdyń túrli tásilderi týraly maqalalar jetip, artylady. Meniń aıtpaǵym ol emes. Men áıeldiń ózine degen qurmeti, mahabbaty jaıly aıtqym kep tur. Er adamdy qurmetteýi, er adamnyń mahabbatyn ómir qýanyshy dep qabyldaýyn aıtam.

Ózińdi ózgertý qıyn. Janyńa qaıaý salatyn tustary barshylyq. Ózińniń «Meniń» arqyly óz ómirińdi búldirip, tozdyryp jatqanyńdy túsiný odan da aýyr. Biraq sol qaıǵyrtatyn jaıt adamdy ózgertedi. Sol ózgeris qaıǵysy qajet. Adam rýhanı ósý, jetilý úshin qaıǵyrý mańyzdy ekenin túsinedi. Qarym-qatynastaǵy qaıǵy – otbasy qurǵysy keletin eki eresek seriktes úshin ómirlik jol bastaýshy.

Qaıǵyny qabyldaı almaıtyn erler men áıelder kóp. Qarym-qatynasta qıyndyqtar týyndaı bastasa, bir-birinen qol úzýge daıyn turady. Jańa qarym-qatynasta da ózindik qıyndyqtar bolady. Qaıǵysyz ómir joq. Sheńber boıy júgire berýden ne ózgeredi?

Ózińizge «Bul jaǵdaı maǵan ne úıretpek?» degen suraqty únemi qoıyp otyryńyz. «Nege bulaı boldy? Men ne úırenýim kerek?» Sonda kúsh-qýatyńyz tekke ysyrap bolmaı, ózińizge tıesili resýrsty alasyz.

Nege qaıǵydan qashamyz? Nege qaıǵyrmaı ómir súrgen jaqsy deımiz?

Otbasy bolyp ómir súrý úshin ystyǵyna kúıip, sýyǵyna tózý kerek. Qarym-qatynas solaı ósedi, órkendeıdi. Adamnyń ózi de eseıe bermek. Odan qorqýdyń qajeti joq. Kez kelgen qarym-qatynas – kúrdeli uǵym. Eger mahabbatty ómirden lázzat alýdyń joly dep qana túsinseńiz, ómirden tez kóńil qalatyny anyq. Ár burylysta bir qıyndyq týyndaryn túsinip baryp otbasy qurý kerek. Qıyndyq, synaq degen bir-birińe kómektesý, burynǵydan da etene jaqyndasýdyń bir baspaldaǵy dep túsingen abzal.

Súıiktiń – birge bolǵan ár sátti rahatpen ótkizetin adam emes. Súıikti adamyń – ol úshin kez kelgen qıyndyqty jeńip, ózgerýge daıyn ekenińdi túsiný. Ony bolmys-bitimimen tolyq qabyldaı alsań, sonda ǵana bul mahabbat bolmaq.

Aýdarǵan Shynar Ábilda

Pikirler