«Halyqtyń narazylyǵy bastalatyn kelesi el – Reseı. Qazir Belarýs elinde bolyp jatqan saıası teketires aldaǵy ýaqytta Reseıde keń kólemde kórinis tabady. Pýtın eki ottyń ortasynda qalady». Bul týraly The Hill saıası basylymyna bergen saraptamasynda Vashıngtondaǵy eýropalyq saıasat ortalyǵynyń sarapshysy Ianýsh Býgaıskı málim etti.
AQSh sarapshysy búginde Aq úı Aleksandr Lýkashenkonyń pozıııasyn qoldap otyrmaǵanyn aıtty.
–Belorýssııadaǵy saılaýdyń nátıjesi múlde burmalanǵan. Eger bul teketires osylaı jalǵasa beretin bolsa, Belorýssııa basqarýǵa kónbeıtin memleketke aınalady. Halyq beıbit jaǵdaıda saıası talaptar qoıǵanymen, bılik aıaýsyz kúsh qoldanyp jatyr. Jaralanǵandar kóp, qaıtys bolǵandar bar. Al Lýkashenko shekten shyqty. Biraq onyń bılikten keter kúni taıaý. Eldegi jaǵdaıdy turaqtandyrý úshin bul berekesizdikke resmı Máskeý aralasýy múmkin. Senarıı osylaı órbıtin bolsa, onda Máskeý reseıshil tulǵany alyp kelýge tyrysady, – deıdi AQSh sarapshysy Ianýsh Býgaıskı.
AQSh-taǵy aldaǵy prezıdenttik saılaýǵa demokrattar atynan synǵa túsip jatqan Djo Baıden «26 jyl boıy elde avtorıtarlyq rejım qurǵan Aleksandr Lýkashenko halyqtyń talabyn tyńdaýy tıis, - dep otyr. Eger ol AQSh-tyń prezıdenti bolsa, Lýkashenkony bılikte qaldyra almaıtynyn málim etti.
Al AQSh sarapshysy Ianýsh Býgaıskıdiń aıtýynsha, qazirgi ýaqytta Reseıdiń qurylymdyq kúshteri halyqtyń narazylyǵyn boldyrmaý, aldyn alý jáne olardyń bir jerge jınalýyna bóget bolatyn ártúrli amaldardy qarastyryp, tipti Gonkong pen Mınsk tájirıbelerin tarazyǵa salyp jatqan kórinedi.
Erkin Qaldan,
«Adyrna» ulttyq portaly
