Memleket basşysy Qasym-Jomart "Jūmysşy mamandyqtarynyŋ qalasyn" aralap kelgen keiın jastarmen jüzdestı, dep habarlaidy “Adyrna” ūlttyq portaly.
Prezident öz sözınde Ukraina töŋıregındegı jaǧdai turaly pıkır bıldırıp, elımızdıŋ tynyştyǧy men tūraqtylyǧy eŋ basty qūndylyq ekenıne nazar audardy.
"Bız "Bırlıgımız – äraluandyqta" ideologiiasyn temırqazyq etıp ūstanyp otyrmyz. Ūltymyz ben nanym-senımımız ärtürlı ekenıne qaramastan, bır qoǧamda tūtas halyq bolyp ömır süremız. Men barşaŋyzdy osynau tereŋ üderıstı tolyq tüsınuge şaqyramyn. Sonda ǧana tabysqa jete alamyz.
Qazır Ukraina jönınde köp aitylyp jatyr. Bız alǧaşqy kezden bastap osy soǧysty mındettı türde toqtatu kerek, diplomatiialyq kelıssözder arqyly bır mämılege kelu qajet dep aittyq. Būl ūstanymymyz endı şyndyqqa ainaldy. Ekı alpauyt el saiasi sūhbat jürgıze bastady. Būl – jaqsy ürdıs. Ärı Qazaqstanǧa paidasyn tigızedı. Sondyqtan bız mūny meilınşe qoldaimyz", – dedı Prezident.
Eske salaiyq, būǧan deiın Tramp men Putinnıŋ jolyǧatyny turaly jazǧan edık.
