Kitaphanalardyń aýasy - ...
Áriptiń átiri!...
Maıysqaq sóreler...
Tóbede "jaryq kúni" - aqyly!...
Halyqtyń aqyny qalypty sórege jetken,
Órege jetpeı, jurtynan, jalyqty ma aqyry?!...
Ańyz ben Abyzdar...
Kitaptar...
Sózderdiń demi...
Aıtatyny bar - qaıtatyn kezderdiń keri!...
"Baıaǵy jartas sol jartas" baǵzy kúnderdiń
Ózeýregeni me bilmedim...
Ózgerdim! - dedi...
Sózderden turady oılarmen sıqyr mundaǵy!....
Kitaphanalardyń qanshasy uıqymdy urlady...
Ózgergen ne bar?...Ómir - aı, bas kótertpeıdi
"Bas - basyna bı bolǵan qıqym" jurnaǵy!...
Jalǵasyp jatyr bul ómir jańa bastalyp,
Alasy alaıady, qaramen aralas halyq!...
Qara óleń oqımyn, qamyqsam, qarańǵy túnde
Tolǵan aı týǵanda tobyǵy jalańashtanyp!...
Órkenıetińe al, endi qarashy ózgeniń....
Ózgerdim deısiń...
Ózgergen shamasy, óz demim!...
Qara shańyraqtyń tórinen Uly Abaı ketpesin,
Qara qazaǵymnyń kúzetken qara sózderiń!
Shaıyrdan qalǵan shym batyp sher, nala, muńǵa
Kún keshken kitap ishinde, men ǵanamyn ba?...
Aqyl izdesem - kitapqa kiriptar bolamyn,
Izderiń kóremin, izdegen Telǵaranyń da!
Jıdegi pisken jyrlardyń Jıdebaıdaǵy
Ańyzdyń otyńa ańyrap kúıgen aıǵaǵy!
"Ishi - ólgen, syrty - saýlardyń" sanynda barmyn
Jastyǵym ótken jastyq pen súıgen aınany!
Bul dáýir qaıta aınalyp Alypqa keldi...
Alyptar alyp shyǵady tamuqtan eldi!...
Sharyqtaý shegi - aspan ba, azat qustardyń?...
Kóleńkeleri qasynda qalyqtap erdi!..
Kóregendigiń de kóremin Hákim Abaıdyń...
Hákim Abaıǵa jyr jazsam, hatyma abaımyn!
Áýezov kelip, áýeli tekseretindeı...
Sózimniń báriń sanamda sahnalaımyn!
Qalyń oılardyń bastaıdy tizbegiń Arman...
Kitapqa qaraımyn...
Ishinde - bizdegi jalǵan!...
Babalar jolyń jalǵaıyn, baǵanaly jurtta
"Óshpeıtuǵyn artynda izderi qalǵan!"
Shuǵyla, nurǵa boıalǵan qubylam - jyr ma?!...
Bir ǵasyr degen ne táıiri?..
Tiri Jambyl ma?!..
Abaı jolyńdaı máńgilik jol bere gór, Alla
Ulylar sherý quratyn - Uly Dańǵylda!
Áýmın!
Altynbek Elemesuly
