Almatydan Taraz qalasyna stýdent bolyp ketip, aktrısa bolyp oralǵan jas óner ıesi Ýsenova Injaıymmen “Adyrna” ulttyq portaly suhbattasqan edi. Súrinip qaıta turǵan óner ıesiniń súbeli áńgimesin nazarlaryńyzǵa usynamyz.
- Almaty-armandar oryndalatyn qala. Osy qalany qıyp Taraz qalasyna ketýińizge ne sebep boldy?
- Almatyǵa grantqa oqýǵa túse almaǵan soń ózime qaltam kóteretin oqý ornyn izdep Taraz qalasyna bardym. Jaqyndarym bolǵan soń ata-anam da qarsy bolmady. Qujattarymdy tapsyryp, Almatyǵa qaıta kelgenimde jylaǵym kelip, Tarazǵa oqýǵa tapsyrǵanym úshin ókingenim ras. Al qazir qýanamyn. Armandar tek qana Almatyda oryndalmaıdy. Buıyrǵan ketpeıdi, qýǵan jetpeıdi demekshi barlyǵy nıetińe, baǵyńa qaraı bolady.
- «TIGÝ jastar teatryna» qalaı keldińiz?
- Oqýǵa túsken jyly “Biz talanttardy izdeımiz” degen saıysqa qatysyp júldeli oryn aldym. Kelesi kúni “Tıgý jastar teatrynda” kastıng bolyp jatyr degendi estidim. Alǵashynda mán bermegen edim, keıin ýnıversıtettegi aǵa-ápkelerim “Baryp baǵyńdy synap kór, sen kastıngtan ótesiń!” dep qoldaý kórsetken soń kóńilderin qımaı bardym. Kastıngten aǵa-ápkelerim aıtqandaı ótip kettim. Basynda ne bolǵanyn túsinbeı júrdim. Keıin qatty qýandym. Osylaısha qazir “Tıgý jastar teatrynyń” jas aktrısasymyn.
- Teatrda júrgenińizge qansha jyl boldy? Sol jyl ishinde qansha sahna men qansha qalany baǵyndyryp úlgerdińiz?
- Bıyl mine úshinshi jylǵa aıaq basty. Ustazym men komandanyń arqasynda qansha qala men aýyldardy aralap shyqtyq. Qazaqstannyń ońtústik-soltústigin kórdik. Ortalyqqa da baryp óner kórsetip qaıttyq. Shyǵys Qazaqstan óńirine de gastrolge shyqtyq. Batysqa barýdy josparlap otyrǵanymyzda myna indet taraǵan soń shyǵa almadyq. Shekaralas baýyrlarymyz Qyrǵystanǵa da qonaq bolyp qaıttyq.
- Teatrda eń alǵash oınaǵan spektaklińiz qandaı? Jáne kimniń rólinde oınadyńyz?
- Eń alǵash «Jeltoqsan jańǵyryǵy» spektaklinde Dámetkenniń (Qaırat Rysqulbekovtyń anasy) rólin oınadym. Eń alǵash kastıngke barǵanda Dámetkenniń dıalogyn oqyǵan edim. Sol kezde ustazym maǵan “Aınalaıyn qyzym, seniń ózińdi, sózińdi kórip Dámetkenniń ózin kórgendeı boldym. Seni sonsha kúttik qoı. Daýysyńnan aınaldym. Seni sonsha kúttik qoı”,- depemirenip, sol róldi maǵan tapsyrdy. Eń alǵashqy rólim osy.
- Mamandyǵyńyz ónermen baılanysty ma? Teatr sabaǵyńyzǵa kedergi keltirmeı me?
- Oqýym ónermen baılanysty emes. Alǵashynda oqýǵa aǵylshyn tili pániniń muǵalimi bolyp tústim. Keıin ata-anammen aqyldasyp fılologııa mamandyǵyna aýystym. Qazir osymamandyq boıynsha bilim alyp jatyrmyn. Teatr oqýyma kedergi keltirmeıdi. Eki jaqty qatar alyp, úlgerip júrmin. Biraq oqýǵa qaraǵanda tetarda ýaqyt ótkizgen ózime qatty unaıdy. Keıde sabaqtan qashyp teatrdaǵy daıyndyqtarǵa ketip qalatyn kezder de bolady. Janym teatrdy qalaıdy.
- Ózińizdiń teatrdaǵy ustazyńyz kim?
- Ónerge baýlyǵan ustazym ánshi, kompozıtor, QR eńbek sińirgen qaıratker-Ábıirbek Tinálıev. Boıymyzdaǵy talantty odan ári darytqan, bar bilgenin úıretip, boıymyzǵa sińirtken ustazyma árqashan da alǵys aıtyp júremin. Tek qana akterlik sheberligimizdi ǵana shyńdap qoımaı, ómirlik azyq bolar aqylyn da aıtyp júredi.
- Bala kezińizde úlken sahnada óner kórsetýdi armandadyńyz ba?
- Sahnanyń úlken-kishisi bolmaıdy. Teatraktrısasy bolýdy armandap úlgermedim de.Biraq, kınoǵa túsip, júrgizýshi bolýdy armandaıtyn edim. Osylaı taǵdyr ózi meni osy jolǵa saldy. Bizge osyndaı múmkindik bergen ýnıversıtetimizdiń rektory Saýryqov Erbolat pen teatrymyzdyń prodıýseri Ashırbekov Sanat aǵaıǵa alǵys bildiremin.
- Ózińizdiń zamandastaryńyzǵa qandaı keńes beresiz?
- Mamandyq tańdaýdan qatelespeńizder. Men sııaqty bir jyldy bosqa ótkizip júrip qalmańyzdar. Qatelespeıtin adam bolmaıdy, osyndaı qatelikterdiń arqasynda ómir súrýdi úırenmiz. Ata-anańyz aıtqan mamandyqty emes, janyńyz qalaǵan mamandyqty tańdańyz. Ata-anańyzǵa keıin qatelespegenińińizdi dáleldeı alasyz. Aqsha kóp jerge emes, jeteleıtin jerge umtylyńyz. Ómirlik tájirbıemnen bar aıtarym osy.
“Adyrna” ulttyq portalynyń atynan sizge shyǵarmashylyq tabystar tileımiz. Ónerińiz órge júze bersin!
Suhbattasqan: Laýra TURSYNJAN,“Adyrna” ulttyq portaly
