Qazaqstan Prezıdenti Toqaevtyń úndeýiniń tolyq mátini jarııalandy. Bul týraly "Adyrna" Aqorda saıtyna silteme jasap habarlaıdy.
"Qurmetti otandastar!
Barshańyzǵa málim, qazir álemdegi pandemııaǵa baılanysty qalyptasqan jaǵdaı kúrdelene túsýde.
Koronavırýstyń taralýy báseńdemeı otyr.
Keıbir elderde bul indet qaıtadan ýshyǵyp bara jatyr.
Álem boıynsha osy vırýsty juqtyrǵandardyń sany shamamen 12 mıllıonǵa jetti, sonyń saldarynan 500 myńnan astam adam qaıtys boldy.
Sol sebepti, birqatar elderde karantın tártibi qaıta kúsheıtilip, áýe, kólik qatynasy qaıtadan shekteldi.
Ókinishke qaraı, bizdiń eldegi jaǵdaı da ońaı bolyp turǵan joq.
Memlekettik komıssııanyń sheshimimen 5 shildeden bastap elimizde eki aptalyq merzimge karantın sharalary engizildi.
Bul asa qajetti sheshim boldy.
Jaǵdaıdyń turaqtalatyny sózsiz. Onyń alǵashqy belgileri de bar. Sondyqtan, aldaǵy eki apta bizdiń bolashaq qadamdarymyz úshin sheshýshi kezeń bolmaq.
Barlyq azamattardy taǵy da karantın erejelerin qatań saqtaýǵa shaqyramyn. Indetpen kúrestiń nátıjeli bolýy, eń aldymen, barsha jurttyń sanaly áreketi men jaýapkershiligine baılanysty.
Bul – óte qaýipti, batpandap kirip, mysqaldap shyǵatyn dert.
Koronavırýstyń taralýyna baılanysty densaýlyq saqtaý júıesine kóp aýyrtpalyq túsýde.
Ashyǵyn aıtý kerek, densaýlyq saqtaý júıesi indetke toıtarys berýge daıyn bolǵan joq. Osy másele boıynsha biz tergeý júrgizemiz jáne bul jaǵdaıdan sabaq alamyz. Ákimderdiń jibergen qatelikterine tıisti baǵa beremiz.
Degenmen, memleket tarapynan barlyq qajetti sharalar qabyldanýda.
Qabyldanǵan sharalar men medıına qyzmetkerleriniń erliginiń arqasynda emdelip shyǵyp jatqan azamattardyń sany edáýir kóbeıdi.
Kóptegen elderdegi jaǵdaı bizden de qıyn.
Degenmen, «Ár qazaq – meniń jalǵyzym» degendeı, Ár azamatymyzdyń qazasy meniń júregime qatty batady. Mynaý alapat indet aramyzdan talaı asyldarymyzdy julyp áketýde.
Búginde qara jamylyp otyrǵan azamattardyń qaıǵylaryna ortaqtasyp, kóńil aıtamyn.
Sol úshin 13 shildeni – Ulttyq aza tutý kúni dep jarııalaımyn.
Biraq, bizdiń kúresimiz jalǵasa beredi.
Bul indetti adamzat jýyq arada jeńe qoımas.
Alaıda, ýaıym men qaıǵyǵa batyp, túrli qaýesetterge senip, eńsemizdi túsirýge taǵy da bolmaıdy.
Salmaqty, sabyrly bolaıyq!
Bizdiń jumysymyz – aıqyn, qoǵam aldynda eshnárseni jasyrmaı, ashyq aıtamyz. Bolashaqta da solaı bolady.
Búkil kúsh jigerimizdi jınap, indetpen kúrese berýimiz kerek.
Osyndaı kúrdeli jaǵdaı kezinde el arasynda kóptegen jalǵan áńgimeler taraýda. Teris aqparat taratyp júrgen aram pıǵyldy adamdardyń áreketteri oryn alýda.
Ókinishke qaraı, keıbir azamattar jalǵan aqparatqa senetin boldy.
Sonymen qatar, taǵy bir mańyzdy másele. Dárigerlerimiz buqaralyq aqparat quraldary arqyly azamattarǵa naqty, birizdi málimet berýi kerek. Dertti emdeýdiń neshe túrli joldaryn kórsetip, adamdardyń densaýlyǵyna qaýip tóndirýge bolmaıdy.
Bundaı áreketterge tosqaýyl qoıý kerek.
Qylmystyq kodekstiń 174-babyna sáıkes jalǵan aqparat taratqan adam jaýapqa tartylady.
Quqyq qorǵaý organdary el ishindegi osyndaı jónsizdikke qatysty qatań sharalar qoldanatyn bolady.
Sol sııaqty dári-dármektiń baǵasyn birneshe ese ósirip, qalyptasqan jaǵdaıdy óz maqsatyna paıdalanǵysy kelgen alypsatarlardy da quqyq qorǵaý organdary meniń tapsyrmama sáıkes jaýapqa tarta bastady.
Qazir memlekettik organdar eldi mekenderdi qajetti dári dármekpen tolyq qamtamasyz etýde. Osyǵan oraı, tıisti qor jasaqtalǵan. Tósek oryndary da, medıınalyq qyzmet kórsetý isi de tolyǵymen qamtamasyz etiledi.
Qurmetti otandastar!
Biz – talaı zobalań men synaqty bastan ótkergen, tarıhtyń talaı daýylyna boı bermegen halyqpyz.
Batyr babalardyń jolyn jalǵaǵan búgingi urpaq ta qazirgi qıyndyqqa tótep beredi dep senemin.
Bálkim, bul bizdiń birligimizdi baıqaý úshin berilgen synaq shyǵar.
Bir jeńnen qol, bir jaǵadan bas shyǵaryp, uıymdasa bilsek, bul synnan da ótermiz.
«Densaýlyq – zor baılyq» degen halqymyzdyń dana sóziniń qadirin bileıik.
Ár azamattyń amandyǵy úshin kúreseıik!
Barshańyzǵa myqty densaýlyq, myzǵymas bereke-birlik tileımin!", - dedi Toqaev úndeýinde.
