Elimizde eks-prezıdent Nursultan Nazarbaevqa arnalǵan taǵy bir eskertkish ashyldy. Bul týraly "Adyrna" Aqordaǵa silteme jasap habarlaıdy.
QR Prezıdenti Qasym-Jomart Toqaev onlaın rejımde Ulttyq qorǵanys ýnıversıtetindegi Qazaqstannyń Tuńǵysh Prezıdenti – Elbasy N.Á.Nazarbaevqa arnalǵan monýmenttiń ashylý rásimine qatysty. Prezıdent Nursultan Nazarbaevtyń qazirgi Qazaqstannyń negizin qalaǵanyn, egemen elimizdiń strategııalyq damý jolyn aıqyndap, halqymyzdy ortaq maqsatqa jumyldyrǵanyn atap ótti.
– Turaqtylyq pen tatýlyq, bereke men birlik – Elbasynyń sarabdal saıasatynyń nátıjesi. Kez kelgen memlekettiń tarıhynda óshpes iz qaldyrǵan biregeı tulǵalar bar. Olardyń sińirgen eńbegin baǵalaı bilý jáne jan-jaqty dáripteý – óskeleń urpaqtyń paryzy, – dedi Qasym-Jomart Toqaev
Prezıdent Elbasynyń elimizdiń qorǵanys qabiletin arttyrýǵa erekshe kóńil bólgenin, memleket eń qıyn kezeńderdiń ózinde de zamanaýı qarý-jaraq alý, otandyq qorǵanys ónerkásibi kesheniniń qýatyn arttyrý, áskerı qyzmetshilerdi baspanamen qamtamasyz etý, jalaqylaryn ýaqytyly berý, joǵary zeınetaqy tóleý mindetterin ońtaıly sheshe bilgenin atap ótti.
– Táýelsizdik alǵan sátten bastap Nursultan Ábishuly Nazarbaev áskerı áleýetimizdi qalyptastyrý barysynda eń kúrdeli degen máselelerdi sheshýge ózi tikeleı aralasty. Onyń basshylyǵymen halqymyz ben elimizdi yqtımal áskerı qaqtyǵystardan qorǵaý maqsatynda armııamyzdyń perspektıvalary men mindetteri, ulttyq qaýipsizdikti qamtamasyz etýdiń basymdyqtary men mehanızmderi aıqyndaldy. Nursultan Nazarbaev Prezıdent bolǵan jyldary áskerı qurylymnyń zańnamalyq jáne quqyqtyq-normatıvtik bazasy ázirlendi. Sondaı-aq Qarýly Kúshterdiń qurylymy men quramy jasaqtalyp, armııanyń qarýlanýy kezeń-kezeńimen iske asyp, zamanaýı ınfraqurylym qalyptasty.
Halqymyzda «El erlerimen eńseli» degen qanatty sóz bar. Shyn máninde, Qarýly Kúshteri qýatty memlekettiń birligi bekem, abyroıy asqaq bolady. Sondyqtan biz armııamyzdyń básekege qabilettiligin arttyrýǵa qashanda basa mán beremiz. Bul rette bilim men ǵylymnyń alatyn orny erekshe. Ulttyq qorǵanys ýnıversıteti aldaǵy ýaqytta da bilikti mamandar daıyndaý isine mol úles qosady dep senemin, – dedi Memleket basshysy.
