Grant ádil taǵaıyndalsyn – UBT-da 122 ball jınaǵan Dııar Abdrahman

3400
Adyrna.kz Telegram

Búgin – Ulttyq biryńǵaı testileýdiń besinshi kúni. Bıyl testileýdi ótkizý tártibi qatańdady. Ár aýdıtorııa beınebaqylaý kameralarymen jabdyqtalǵan, testileý barysyn táýelsiz sarapshylar baqylaıdy. Sondaı-aq UBT-da tyıym salynǵan zattardy paıdalanǵan talapkerler aýdıtorııadan shyǵarylady. UBT-da 122 ball jınaǵan Pavlodar qalasynyń túlegi Dııar Abdrahman ereje jalpyǵa ortaq, túlekterdiń barlyǵy birdeı jaǵdaıda daıyndalýǵa múmkindik aldy, grant ádil taǵaıyndalýy kerek deıdi.

«Meniń oıymsha, telefon, shpargalka kirgizetin túlekter óz bilimimen tapsyrǵan balalardyń memlekettik grant utyp alýyna kedergi bolady. Sondyqtan tyıym salynǵan zattardy ózge túlekter paıdalanbaýy kerek. Oǵan jol berilmese eken. Bizge muǵalimderimiz telefonmen ustalyp qalsaq baqylaýshy aýdıtorııadan shyǵaryp, akt toltyratynyn únemi eskertip júrdi. Eger UBT-dan bul joly súrinseńizder, tamyz aıynda taǵy bir tapsyryp kórýge bolady. Daıyndyq barysynda Ulttyq testileý ortalyǵynyń saıtyndaǵy tegin synama testerdi jıyrma shaqty ret oryndadym. Bizden bir synyp joǵary oqyǵandarǵa mundaı múmkindik jasalmady, bizdiń jolymyz bolǵan sııaqty. Tipti kalkýlıatordy da paıdalandyq», – dedi Dııar Abdrahman.

Aıta keteıik, erejeni buzbaǵan túlekter  tamyz aıynda ótkiziletin UBT-ǵa qatysa alady. Bul shekti balldy jınaı almaǵan túlekter úshin qosymsha múmkindik.

"Adyrna" ultttyq portaly

Pikirler