بۇگىن – ۇلتتىق بىرىڭعاي تەستىلەۋدىڭ بەسىنشى كۇنى. بيىل تەستىلەۋدى وتكىزۋ ءتارتىبى قاتاڭدادى. ءار اۋديتوريا بەينەباقىلاۋ كامەرالارىمەن جابدىقتالعان، تەستىلەۋ بارىسىن تاۋەلسىز ساراپشىلار باقىلايدى. سونداي-اق ۇبت-دا تىيىم سالىنعان زاتتاردى پايدالانعان تالاپكەرلەر اۋديتوريادان شىعارىلادى. ۇبت-دا 122 بالل جيناعان پاۆلودار قالاسىنىڭ تۇلەگى ديار ابدراحمان ەرەجە جالپىعا ورتاق، تۇلەكتەردىڭ بارلىعى بىردەي جاعدايدا دايىندالۋعا مۇمكىندىك الدى، گرانت ءادىل تاعايىندالۋى كەرەك دەيدى.
«مەنىڭ ويىمشا، تەلەفون، شپارگالكا كىرگىزەتىن تۇلەكتەر ءوز بىلىمىمەن تاپسىرعان بالالاردىڭ مەملەكەتتىك گرانت ۇتىپ الۋىنا كەدەرگى بولادى. سوندىقتان تىيىم سالىنعان زاتتاردى وزگە تۇلەكتەر پايدالانباۋى كەرەك. وعان جول بەرىلمەسە ەكەن. بىزگە مۇعالىمدەرىمىز تەلەفونمەن ۇستالىپ قالساق باقىلاۋشى اۋديتوريادان شىعارىپ، اكت تولتىراتىنىن ۇنەمى ەسكەرتىپ ءجۇردى. ەگەر ۇبت-دان بۇل جولى سۇرىنسەڭىزدەر، تامىز ايىندا تاعى ءبىر تاپسىرىپ كورۋگە بولادى. دايىندىق بارىسىندا ۇلتتىق تەستىلەۋ ورتالىعىنىڭ سايتىنداعى تەگىن سىناما تەستەردى جيىرما شاقتى رەت ورىندادىم. بىزدەن ءبىر سىنىپ جوعارى وقىعاندارعا مۇنداي مۇمكىندىك جاسالمادى، ءبىزدىڭ جولىمىز بولعان سياقتى. ءتىپتى كالكۋلياتوردى دا پايدالاندىق»، – دەدى ديار ابدراحمان.
ايتا كەتەيىك، ەرەجەنى بۇزباعان تۇلەكتەر تامىز ايىندا وتكىزىلەتىن ۇبت-عا قاتىسا الادى. بۇل شەكتى باللدى جيناي الماعان تۇلەكتەر ءۇشىن قوسىمشا مۇمكىندىك.
"ادىرنا" ۇلتتتىق پورتالى
