Jurt koronavırýspen áýre bolyp júrgende Ile-Alataý memlekettik ulttyq tabıǵı parkiniń bir bóligi qalaısha jeke qolǵa ótip ketkenin búgin Ekologııa vıe-mınıstri tilshilerdi jınap túsindirýge tyrysty dep habarlaıdy KTK telearnasy.
Úlken Almaty kóli, Talǵar orman sharýashylyǵy, Túrgen jáne taǵy basqa da qoryq aýmaǵyna kiretin birqatar jerler jeke kompanııalardyń birine 49 jylǵa jalǵa berilipti.
«Tenderdi tek týrızmdi damytý maqsatynda ótkizdik» dep aqtalǵan sheneýnikter basqalardyń bul memlekettik satyp alýǵa qyzyqpaǵanyn aıtady. Alaıda jýrnalısterge ótkizilgen jıynǵa saý ete qalǵan ózge týrızm ókilderi olardyń ótirigin shyǵardy. Qyrýar aqshanyń kózine aınalǵan Alataýǵa talas jaıly: Ile-Alataý ulttyq tabıǵı parki qazir karantınge jabyq. Jeke qolǵa ótken jerdiń jaıyn jýrnalısterge túsindirýge asyqqan Ekologııa vıe-mınıstri Erlan Nysanbaev muny esten shyǵarsa kerek. Aıyppuldan qorqaqtasaq ta, astanadan at aryltyp kelgen sheneýniktiń artynan tyıym salynǵan aýmaqqa óttik. Al betperde kııýdi de qajet dep tappaǵan vıe-mınıstrge Alataýdyń taza aýasy áser etti me, álde týǵan jerdiń topyraǵy tartty ma, áıteýir tabıǵatqa degen sezimin aqtardy.
Erlan Nysanbaev, Ekologııa, geologııa jáne tabıǵı resýrstar vıe-mınıstri:
- Tabıǵatty jaqsy kóremin! Biz endi ormanshymyz ǵoı, meniń mamandyǵym orman salasynan – ınjenermin. Tabıǵat keremet qoı! Ańǵa barmaımyn, myltyq ta joq mende, biraq balyqqa baryp turamyn.
Biraq vıe-mınıstrdyń bul jolǵy maqsaty – tabıǵatty tamashalaýdan buryn, ulttyq park aýmaǵynda bastalǵaly jatqan úlken bıznesti buqaraǵa túsindirý. Sózine sensek, tenderdi utqan ınvestor Alataý baýraıyn etno-aýyldarǵa toltyrady. Odan qaldy, týrısterdiń tynyǵýyna arnalǵan kempıngter ashady. Tómende tolǵan meıramhanalarǵa túspeı, taý arasynda júrip-aq tamaq jeıtin oryndar paıda bolady eken. Al eń bastysy, «memlekettik qazyna qampaıady» - deıdi Erlan Nysanbaev.
Erlan Nysanbaev, Ekologııa, geologııa jáne tabıǵı resýrstar vıe-mınıstri:
- 14 mıllıard aqsha salamyn dep otyr. Ol qomaqty soma.
- 14 mıllıard dollar ma?
- 14 mıllıard teńge! Ózderińiz bilesizder, osynshama nysan salynsa, ol birinshiden, jumys orny, ekinshiden, bul tabys. Tabys kózi bolǵan soń, onyń artynda salyq bar. Jyl saıyn qazynaǵa 1 mılllard 200 mıllıondaı aqsha túsedi dep boljanyp otyr.
Úlken Almaty kóli, Talǵar orman sharýashylyǵy, Túrgen, Býtakovka men Alma-Arasan shatqaldary jáne taǵy basqa aýmaǵy 35 gektar bolatyn jerdi baqandaı 49 jylǵa jalǵa alǵan kompanııa ashylatyn nysandardyń sýretterine deıin salyp qoıypty. Al tender naýryz aıynda ótkizilipti. Bir qyzyǵy, jerdi ıelengen kompanııa sol memlekettik satyp alýǵa jalǵyz qatysqan.
Damır Malgeldıev, «Ile-Alataý» ulttyq tabıǵı parkiniń bas dırektory:
- Bir aı saıtta turdy. Kópshilik kórdi. Myna bolǵan jaǵdaı, men sizderge aıtyp keteıin, karantınge deıin bolǵan jaǵdaı. Sodan eshkim bolmaǵannan keıin biz zań boıynsha «Kýltaý» degen ınvestor bizge qatysty, komıssııamen qaraldy jáne bir daýyspen bári.
Sheshim de nebári jarty saǵattyń aıasynda qabyldanǵan. Al fırmanyń ózi buǵan deıin Qapshaǵaıdyń tóńiregindegi jer ýchaskelerin alyp-satýmen aınalysypty. Iaǵnı, týrızmge de, tabıǵatqa da qatysy joq. Dese de «tenderge basqa eshkim qyzyǵýshylyq tanytpady» degen sheneýnikterdiń sózin taýdaǵy jınalysqa saý ete qalǵan ózge týrızm ókilderi teriske shyǵardy.
Asqar Bákıev, taý saıahatshylarynyń gıdi:
- Biz de osy ekologııalyq palataly lager boıynsha jobany kúzde bergenbiz, Ile-Alataý ulttyq parkine. Biraq eshqandaı jaýap alǵan joqpyz. Bul tenderdi qaıtadan ótkizgeni durys. Barlyq týr kompanııalar jáne de sol salada tájirıbesi bar kompanııalar qatyssa, ádil bolýshy edi.
Ile-Alataý ulttyq parki. Aýasyn ókpeńdi qansha toltyra jutsań da, toımaısyń. Ózenniń syldyry, qustardyń saıraǵany estiledi. Biraq, bul tynyshtyq kóp uzamaı buzylady. Tenderge ózi ǵana qatysyp, ózi utyp alǵan kompanııa kelesi aptadan bastap jumysyn bastaıdy. Al bir aıdan keıin munda shyrshalardyń janynda jańadan nysandar paıda bola bastaıdy.
