Pedagogtarga 2 mlrd 67 mln teńgeden astam qarjy qaıtaryldy

3478
Adyrna.kz Telegram
Qazaqstandyq salalyq bilim jáne ǵylym qyzmetkerleri kásipodaǵynyń aralasýymen 2019 jyly respýblıka ustazdaryna 2 067 124 753 teńge qarajat qaıtarylyp berildi. Salalyq kásipodaqtyń baspasóz qyzmetiniń habarlaýynsha, bul - ustazdardyń durys tólenbegen jalaqylary, saýyqtyrý járdemaqylary men issapar shyǵyndary jáne merziminen keshiktirilip óndirilgen aqyly eńbek demalysynyń qarajattary. Muǵalimderdiń mańdaı teri nápaqasyn keshiktirip tóleý faktisi oryn alǵan aımaqtardyń arasynda Mańǵystaý oblysy kósh bastap tur. Qaıtarylǵan somanyń 1 mlrd 400 mln teńgeden astamy osy oblystyń ustazdaryna tıesili.
Salalyq kásipodaq qyzmetiniń negizgi baǵyttarynyń biri kásipodaq músheleriniń eńbek quqyqtaryn qorǵaý.
Osy maqsatta 2019 jyly  Qazaqstandyq Salalyq kásipodaqtyń múshelik uıymdarynyń quqyqtyq qyzmetkerleri bilim berý uıymdarynda eńbek zańnamasyn oryndaý boıynsha 4057 qoǵamdyq  baqylaý júrgizip, 3807 túrli eńbek zańnamasyn buzýshylyq deregin anyqtady. Onyń 1117-i aılyq aqynyń durys tólenbeýi boıynsha, 760-y jumys ýaqyty men demalý rejıminiń buzýshylyǵyna,  1328-i - eńbek qatynastaryn rásimdeýge jáne 632-i basqa da quqyq buzýshylyqqa qatysty.
Tekserister nátıjesinde Salalyq kásipodaqtyń kúshimen 40 qyzmetker jumysyna qaıtaryldy, onyń 8-i sot arqyly. 132 qyzmetkerdiń zańsyz jumystan qýdalanýynyń aldy alyndy.
Salalyq kásipodaqtyń quqyqtyq ınspektorlary kásipodaq músheleriniń quqyqtyq saýattylyǵyn kóterý maqsatynda birqatar jumys atqardy. Byltyrǵy jyly sala qyzmetkerlerine 11 642 keńes berildi. 1 193 jazbasha ótinish qaraldy.
Pikirler