Qymbat maǵan elimniń bar dalasy,
Baltyq penen Sahalınniń arasy.
Qaıda bolsam qııam oǵan janymdy,
Týǵan jerden qazsyn biraq qabirdi.
Týǵan jer - ár adamnyń ómirinde erekshe oryn alatyn qutty meken. Sebebi osynaý kindik qanyń tamǵan jerde sen ósip-ónip,tamyryńdy jaıasyń. Ol jerde seni álpeshtegen anań,aıalap ósirgen ákeń,bilim jolyna jetelegen ustazdaryń, sol bilimge umtylý jolyndaǵy taı-qulyndaı tebisken jora-joldastaryń dúnıege kelgen.
Meniń týyp ósken jerim "Bulan aýyly" dep atalady. Dúnıedegi eń uly degen nársemen para-par sanalatyn aýylymdy óle-ólgenshe qadirlep ótemin.Osy tusta Bulan ataýynyń shyǵý tarıhyn tilime tıek etkim kelip otyr. Ertede XIX ǵasyrdyń ortasynda aýylymyzdyń qaq tórine bir top bulan janýary kelip qonys teýipti. Bul qys kezi bolsa kerek,eshkimge zııany joq janýarlardy aýyl turǵyndary qýyp jibermeı,kerisinshe,olarǵa qamqorlyq kórsetedi. Sodan beri bizdiń aýyl jer-jerge "bulan qonys tepken qutty aýyl" dep tarap ketedi. Osylaı "Bulan aýyly" jańa atqa ıe bolypty.
Aýylymyzdyń janynda Shiderti ózeni aǵyp jatyr.Ol bizdiń aýylǵa sonaý Araltóbe jaqtan keledi.Ózenimizdiń ataýynyń da ózindik shyǵý tarıhy bar."Qyz Jibek" jyrynyń bas keıipkeri Tólegenniń Jaıyqtan arý izdegeni jáne meniń týǵan jerimnen ótkeni tarıhtan belgili.Sol bir kezderde ol ózen boıyna toqtap,demalady.Keıin osy ózenniń jaǵasynda shiderin qaldyryp ketipti-mys.Osy jaǵdaıǵa káý bolǵan aýyl turǵyny ózendi "Shiderti" dep atap ketedi.Mine, meniń aýylym osyndaı tarıhı oqıǵalardy basynan keshirgen.
Elimiz jańa tarıhı kezeńge aıaq basty.Biz qaıta túleýdiń aıryqsha mańyzdy eki proesi - saıası reforma men ekonomıkalyq jańǵyrýdy qolǵa aldyq. Eks prezıdentimiz N.Nazarbaev aýyldy kórkeıtýge,onyń dárejesin ósirýge basa nazar aýdarǵan bolatyn.Soǵan baılanysty "Dıplommen aýylǵa" t.s.s kóptegen baǵdarlamalardy jaryqqa shyǵardy.Meniń oıymsha da "Máńgilik el" bolýdy aýyldan bastaýymyz kerek.Aýyl - bizdiń barlyǵymyzdyń túlep shyqqan mekenimiz. Aýyl kórkeıýi kerek! Biz, jastar, elimizdi damytýdy óz týǵan jerimizden bastaıyq!
Saǵıdoqas Gúlden,
Ál Farabı atyndaǵy QazUÝ Fılologııa jáne álem tilderi fakýltetiniń stýdenti.
Ǵylymı joba jetekshisi: F.Qozybaqova,
Ál-Farabı atyndaǵy Qazaq ulttyq ýnıversıteti
Tarıh jáne arheologııa,etnologııa fakýltetiniń
Qazaqstan tarıhy kafedrasynyń professory
