Qazaqstannyŋ Işkı ıster ministrlıgınıŋ ökılderı Jambyl oblysy Qordai audanyndaǧy tärtıpsızdıkter saldarynan qaza bolǧandardyŋ arasynda Masanchige basqa auyldan kelgen bır adam bolǧanyn rastady, - dep habarlaidy Tengrinews.kz tılşısı.
"Darhan Äbdırahym turaly ne bılemız? Ol - qazaq. Osy künge deiın tuǧan-tuystary onyŋ qaitys bolǧany turaly habar alǧan joq. Darhan jeke tasymaldaumen ainalysqan. Onyŋ qūjattary maşinada bolǧan. Qaqtyǧys bolǧan tünde ol Masanchige audannyŋ basqa tūrǧyndary siiaqty kömekke barǧan. Jıgıt 25 jasta edı. Ol qan-josa bolyp jatqan jerınen tabylǧan. (...) Maşina bülıngen, qūjattar joǧalǧan. Ol otbasynda jalǧyz bala edı. Onyŋ artynda üş balasy qaldy. Kölıgın kreditke alǧan. Jergılıktı atqaruşy organdardan qaitys bolǧan adamnyŋ ata-anasyna älı eşkım barǧan joq. Jurnalister de bolǧan joq. Ötken künnen berı qaza tapqan jas jıgıtterdıŋ esımı taraldy. Nege Darhan turaly mälımet belgısız?", - dep jazdy Azamat Erǧali Facebook-te.
IIM baspasöz qyzmetındegıler Darhan Äbdırahymnyŋ qaza tapqan 10 adamnyŋ ışınde baryn rastady.
"İä, ol (Darhan Äbdırahym) qaza tapqan 10 adamnyŋ ışınde bar", - dedı baspasöz qyzmetındegıler.
Būǧan deiın Masanchi auylyndaǧy tärtıpsızdıkte qaza tapqan 8 adamnyŋ tızımı jariialanǧan edı.
Eske salaiyq, 7 aqpanda Jambyl oblysy Qordai audany Masanchi auylynda tūrǧyndar arasynda jappai töbeles boldy. Oqiǧa saldarynan 8 adam qaza tapty. Medisinalyq mekemelerge 137 adam kömek sūrap keldı.
Ūqsas jaŋalyqtar
