29 qyrkúıekte Almaty gornızonynyń áskerı sotynda Jambyl oblysy Qordaı aýdanyndaǵy qazaqtar men dúngender arasyndaǵy ultaralyq janjaldan soń kúdikke ilingen 50-den astam adamnyń jeteýine úkim shyqty.
Úkimge saı, Abzal Nurahanov "jappaı tártipsizdikke qatysty" (Qylmystyq kodekstiń 272-baby) jáne "urlyq jasady" (Qylmystyq kodekstiń 188-baby) degen aıyppen segiz jylǵa sottaldy. Sýdıa úkim shyǵarǵanda Nurahanovtyń "ekinshi ret aýyr qylmys jasaǵanyn" eskergen.
Sot Baqytbek Ibragımovty "asa iri kólemde urlyq jasady" dep jeti jylǵa sottady. Sot úkim shyǵarǵanda onyń "ekinshi ret aýyr qylmys jasaǵanyn" eskergen.
Nurahanov jazasyn qatań ári erekshe tártiptegi túrmede, Ibragımov jazasyn qatań tártiptegi túrmede óteıdi.
Budan bólek, Myrzaǵalı Dúısenbaev "asa iri kólemde urlyq jasady" degen aıyppen bes jylǵa sottaldy. "Jappaı tártipsizdikke qatysty" dep aıyptalǵan Rústem Bejibaev tórt jylǵa, Erlan Buralqynov 3 jyl 20 kúnge, Ulan Atambaev pen Almat Tileýǵalıev úsh jylǵa túrmege qamaldy. Olar jazasyn qaýipsizdigi ortasha túrmede óteýi tıis.
Sot úkimi áli kúshine engen joq. Aıyptalýshylar úkimmen kelispeıdi jáne apellıaııalyq shaǵym túsirmek.
Bes jylǵa sottalǵan Dúısenbekov sotta "Men taksıst bolǵanym úshin sottap jatyr. Úıde bala-shaǵam bar, bala-shaǵamdy baǵatyn jalǵyz adammyn. Kelinshegim aýyrady, qyzymnyń júreginde aqaý bar, Sot maǵan eshqandaı jeńildik qarap jatqan joq. Men [janjal bolǵan jerge] taksıst bolyp bardym, negizi urlyq jaıynda eshteńe bilmeımin. Sonyń bárin tergep, bilip tursa da sottap jiberdi" dedi.
Úsh jylǵa sottalǵan Almat Tileýǵalıev "Biz óz máselemizdi oılap, urlyq, tonaý maqsatynda barǵan joqpyz, biz tek áleýmettik jeliden kelgen vıdeolardy kórip, qazaqtarǵa kómekteseıik dep, janashyrlyq tanytyp barǵanbyz. Al endi mynandaı úkimnen keıin qandaı ádilet suraısyz?" dedi.
7 aqpan kúni túnde Jambyl oblysy Qordaı aýdanynda qazaqtar men dúngender arasynda qaqtyǵys bolǵan. Oqıǵa kezinde 11 adam qaza tapqan. Janjaldan soń 120-dan astam qylmystyq is qozǵalyp, 59 adamǵa aıyp taǵylǵan. Aıyptalýshylardyń soty ár qalada ótip jatyr.
Prokýratýranyń málimetinshe, Qordaıdaǵy ultaralyq janjal kezinde 164 úı men saýda orny, 100 kólik qıraǵan. 342 adam jábirlenýshi dep tanylǵan. 400-den astam ekspertıza júrgizilip, myń jarymnan astam adam suralǵan.
Qordaıdaǵy janjal kezinde negizinen etnıkalyq dúngender turatyn Masanchı, Sortóbe, Aýqatty aýyldary kóp zardap shekken.
Resmı málimet boıynsha, janjalǵa Sartóbe aýylyndaǵy qazaqtar men dúngender arasyndaǵy kıkiljiń sebep bolǵan. Tergeý organdary dereginshe, ulty dúngen Marat Iýnhý jolǵa shyǵyp, aýladan aǵasy mingen júk kóligin shyǵarý úshin basqa kólikterdi toqtatqan. Dál osy kezde 78 jastaǵy qazaq Tólegen Qudashbaevty balalary kólikpen dárigerge apara jatqan. Osy kezde eki jaq jolǵa talasyp, tóbelesip qalǵan. Qarııanyń jambasy synǵan, onyń ulynyń bas súıegi men mıyna zaqym kelgeni habarlanǵan. Keıin sot Marat Iýnhýdy 2,6 jylǵa sottaǵan. Al onyń ákesi Ersman Iýnhýdyń bas bostandyǵyn 2,6 jylǵa shektegen.
Qordaıdaǵy janjaldan soń Jambyl oblysynyń ákimi Asqar Myrzahmetov bastaǵan birneshe sheneýnik jáne polıııa departamentiniń basshysy qyzmetten ketti. Onyń ornyna sol kezde premer-mınıstrdiń orynbasary bolǵan Berdibek Saparbaev taǵaıyndaldy.
29 sáýirde Almatydaǵy tergeý ızolıatorynda ultaralyq janjalǵa baılanysty ustalǵan Bekbol Kıbaev qaıtys boldy. Prokýratýra osy oqıǵa boıynsha sotqa deıingi tergeý bastalǵanyn habarlady. Oqıǵanyń basqa jaıttary belgisiz.
